Colunga critica l'Asturies actual y plantea otru modelu nel DOP

El Debate d’Orientación Política entamó’l vienres 15 cola intervención del diputáu del BA y voceru del Grupu Mestu, Roberto Colunga. Vivir fuera de la realidá, los recortes y el despreciu a la cultura fueron les principales crítiques.

El diputáu del Bloque por Asturies, Roberto Colunga, pronunció un discursu mui críticu cola xestión del Presidente del Principáu, Vicente Álvarez Areces. “Autocomplacencia y l’ausencia de la mínima autocrítica”, foi como definió Colunga les palabres defendides el xueves 14 por Areces na so intervención.

“L’estáu de felicidá nel que vive’l Presidente dende hai 11 años, xunto colos sistemáticos y permanentes sobrecostos de la obra pública n’Asturies, son el verdaderu fechu diferencial de l’autonomía asturiana”, opinó Colunga, que tamién recordó qu’Asturies tien la cifra más alta del Estáu español de ciudadanos qu’opinen que la so autonomía “nun tien capacidá pa defender los intereses d’Asturies”.

Recortes y falta d’empléu
L’estáu ayenu “a la realidá d’esti País”, exemplificólu’l diputáu del Bloque por Asturies nos recortes a funcionarios públicos; nel retayu de más de 500 puestos de trabayu n’educación; na sanidá, “onde se quieren privatizar servicios”.
 
“Yera bono que-y preguntara sobre la percepción de la so realidá a los trabayadores de Naval Xixón, de Juliana, de Venturo XXI (…) igual nun tienen la mesma opinión”, dixo-y Colunga a Areces en crítiques a la situación llaboral del país.

80.000 persones en paru, casi un 20% de la población asturiana, ye la cifra oxetiva que’l nacionalista recordó-y al Presidente del Principáu. Amás sorrayó les consecuencies de la emigración de mozos asturianos y qu’Asturies tien “los índices de natalidá más baxos del mundu”, lo que fai que casi’l 25% de la población asturiana tenga más de 65 años.

Tamién tachó de “actitú vergoñosa” el que’l Gobiernu asturianu nun de respuesta a les midíes qu’anuncien en Madrid y que, según Roberto Colunga, “ponen en peligru miles de puestos de trabayu”. “El Gobiernu del Principáu tien que defender los derechos d’Asturies ente’l Gobiernu de Madrid”, sentenció Colunga nesi sen.

Crisis social y ecolóxica
En cuantes a la crisis internacional, el voceru del Grupu Parllamentariu Mestu señaló que “Asturies carez una crisis económica y financiera que tán pagando los que nun la xeneraron” y que’l gobiernu asturianu ta intentando convencer “de la bondá de les sos recetes d’axuste afitaes nel patrón neolliberal”.

“Unes recetes d´axuste que nin sirven pa resolver los graves problemes sociales presentes en forma de probitú, paru y precariedá llaboral, que nun sirven p’avanzar nun cambiu de modelu basáu na equidá social y la sostenibilidá ecolóxica”, opinó Colunga.

Tamién faló’l diputáu del BA d’una “crisis ecolóxica, que tien el so mayor exponente nel cambiu climáticu”. Nesi sen, crticó qu’l gobiernu asturianu defenda incineradores y llínes d’alta tensión.

Nesta parte de la intervención cayeron les crítiques más dures pa la Llei d’Axuste, midía que causó la marcha del Bloque del gobiernu asturianu. Colunga criticó que los recortes asturianos fueran “muncho más allá de lo que ye d’obligao cumplimientu”, opinó que “ye un frenu al desarrollu y al crecimientu económicu”, too esto nun contestu “d’enorme precariedá llaboral y conxelación de pensiones”.

Cultura y llingua
Nun faltó’l reproche hacia’l tratu del executivu asturianu pa cola llingua y cultura, daqué que’l xueves Areces obvió nel so discursu. “Nin una sola palabra pa la política llingüística. Mire, neso nun nos sorprendió. Yá lo esperábemos”, ironizó Colunga.

“Sectarismo y despreciu a la llingua y cultura d’Asturies” ye la opinión que’Areces tien de la identidá asturiana, según diputáu del BA. Nesi sen citó exemplos como la especialidá de la llingua asturiana, l’asturianu na RTPA, o la estabilidá de los trabayadores de la Rede de Normalización Llingüística, ente otros.

“Tábemos esperando que nos dixera cuánto nos costó la gala desastrosa qu’organizó pa la TPA por cuenta del Día d’Asturies”, planteó Colunga denunciando los contratos firmaos ente la RTPA y el Grupu de José Luis Moreno.

Tampoco faltó recordar el rechazu a qu’Asturies sea protagonista del Festival Intercélticu de Lorient en 2011. “Ponen en marcha l’autopista del mar y nun son capaces d’aprovechala pa potenciar la imaxen d’Asturies (…) pero claro, ye meyor escuchar a La Pantoja na Llaboral, que potenciar la cultura y la música asturiana nel mundu”, sorrayó’l voceru parlamentariu.

Alternatives
Xunto a les crítiques llegaron les propuestes. Unos planteamientos que, según Roberto Colunga, llamen a “encarar la crisis dende la izquierda y a lluchar por un futuru dignu pa la xente”.  Porque, como-y espetó  a Areces “usté garra´l violín cola izquierda, pero tócalu cola derecha”.

En cuenta de recortar sueldos públicos y polítiques sociales, el diputáu del BA planteó “poner frenu a los sobrecostes del HUCA o del Musel, a la suspensión de les retresmisiones del fútbol o la fórmula 1 de la TPA (…) o a la paralización de proyectos faraónicos multimillonarios”.

“Ye posible articular otres polítiques basaes na xusticia social y el repartu de sacrificios pa protexer lo prioritario: crear empléu, lluchar contra´l paru, impulsar l´actividá económica, garantizar los servicios públicos y les polítiques sociales”, planteó Colunga que, nesta llínia, sorrayó que’l Bloque por Asturies tien alternatives y va defendeles na negociación de los presupuestos del 2011.

El diputáu nacionalista defendió que la salida a la crisis n’Asturies pasa “por una verdadera reforma fiscal amplia y progresiva” y, ente otres coses, “una verdadera política d’austeridá erradicando tolo suplerfuo na alministración asturiana”.

A lo último, Roberto Colunga recalcó la necesidá “d’abrir un procesu de rexeneración democrática, que se contraponga’l silenciu la resignación de los que son cómplices del réxime que carecemos n’Asturies. Fai falta un cambiu fondu. Nun pue haber espaciu pal pesimismu”.