Ferrán diz que se sal de la crisis trabayando más y ganando menos

El presidente de la CEOE, Gerardo Díaz Ferrán, afirmó que pa salir de la crisis económica los trabayadores tienen que trabayar más y, desgraciadamente, ganar menos". "Ye bien duro dicilo, pero ye la verdá", señaló.

En declaraciones a los medios antes de participar nun actu entamáu pola organización de mozos empresarios CEAJE, Díaz Ferrán calcó en que nun se pue trabayar como se fai nesti momentu. Según argumentó, antes de la democracia trabayábense 48 hores selmanales, que pasaron a ser 40 oficiales, pero de les que, en realidá, namás son efectives 38 hores.
  
Asina, el patrón de patronos entiende que "ye imposible tar trabayando 38 hores y pensar que se va a salir de la crisis".
  
"Los trabayadores tienen que saber que pa caltener el so puestu de trabayu, el productu o'l serviciu que salga de la so empresa tien que ser competitivu. Si nun s'aumenta la productividá y si nun se tienen los costos salariales adecuaos, la empresa acaba zarrando y esi trabayador que quier cobrar más a lo último nun acaba cobrando más que'l paru", aseguró.
  
De la mesma, Díaz Ferrán pidió a los sindicatos que "pongan les piles" y cumplan l'acuerdu de negociación colectiva vixente hasta'l 2012, que prevé incrementos salariales non superiores al 1%.

Reforma de la negociación colectiva
Per otru llau, preguntáu por cuándo presentará la CEOE les sos propuestes pa la reforma de la negociación colectiva, el presidente de la patronal avanzó que se va estudiar un documentu al respecto na Xunta Directiva del próximu día 20, pa entamar dempués a negociar colos sindicatos.
  
"Vamos entrar nesa negociación yá. Que nun tengan priesa los sindicatos", precisó'l dirixente empresarial, que repostió que, con bona voluntá, nun mes podría tar zarrada esa reforma.
  
Sobre les elecciones na patronal, Díaz Ferrán confirmó que'l próximu día 20 va proponer a la Xunta l'adelantu de los comicios, pero refugó responder a si va presentase o non a la reelección "por respetu" a los órganos de dirección de CEO. "Nun voi desvelalo tovía", dixo.