Tolos grupos menos el PSOE critiquen la intervención d'Areces

Tres de la intervención del Presidente del Principáu nel DOP, cadún de los grupos parlamentarios valoró en rueda de prensa les sos declaraciones. Tolos grupos, sacantes el PSOE, criticaron d’un mou o otru les palabres d’Areces.

Per primer vez con voz propia na Xunta Xeneral del Principáu d’Asturies, el voceru del Grupu Mistu, Roberto Colunga (BA), señaló que'l presidente del Principáu d'Asturies, volvió demostrar que vive "bien feliz" nuna realidá que nun coincide cola que tán sufriendo los ciudadanos.
  
El diputáu del Bloque por Asturies, señaló que'l dirixente socialista "nun quier dase cuenta" que la xente nun llega a fin de mes, qu'hai casi 100.000 paraos n'Asturies o que los llocales tán arrendándose, vendiéndose y trespasándose.
  
Asina, Colunga piensa qu'Areces intentó "vender" llogros "escondiéndose" baxo la crisis internacional. "Nun creo que la xente d'Asturies puea entendelo, porque lo que precisen son salíes a los problemes reales y cotidianes", comentó.

Tuerta ente ciegos
El voceru d'IU-Verdes, Jesús Iglesias, señaló qu'Asturies "nun pue conformase con ser la tuerta nel país de los ciegos". Reconoció que la Comunidá Autónoma evolucionó de forma positiva nos últimos años, pero nun hai que quedar ehí.
      
Pa IX-Verdes, la esixencia de los ciudadanos ye que los políticos apliquen con "ambición" y "compromisu" midíes p'amenorgar el nivel de paru, pa garantizar que la educación y sanidá nun van ver amenorgaos los sos niveles, pa que se dea prioridá a les inversiones nos proyectos más útiles y capaces de xenerar empléu, y pa ofrecer les prestaciones sociales necesaries a los más desfavorecidos.

Teatru del absurdu
El voceru axuntu del Grupu Parlamentariu del PP, Joaquín Aréstegui, manifestó esti xueves que nel discursu del Presidente Vicente Álvarez Areces del Debate d'Orientación Política "cualquier paecío cola realidá ye pura coincidencia".
  
Pal PP la presencia d'Areces nel parlamentu foi "como la presencia d'un personaxe del teatru del absurdu que s'echa a contar coses que nada tienen que ver cola realidá". "El discursu acabó como'l de va 12 años, con una brasa d'hora y media con considerances bien alloñaes de la realidá", dixo Aréstegui.
  
Al so xuiciu nel so analís "complaciente y complacíu", Areces olvidóse de munches coses, confundió la realidá coles sos ficciones y nun fizo mención a nengún de los numberosos problemes que preocupen a los asturianos.
  
Lastra: “(Areces) Fizo lo que debía”
D’otra banda, el voceru del Grupu Parlamentariu del PSOE, Fernando Lastra, xustificó’l discursu de Vicente Álvarez Areces nel Debate d’Orientación Política y aseguró que “fizo lo que debía: balance de xestión y presumir de los ésitos porque los hai”.

Pal grupu socialista’l momentu necesitaba d’un discursu como’l pronunciáu por Areces y consideren que sería más dudosu un discursu que nun tuviere en cuenta qu’esti yera l’últimu añu de llexislatura y l’últimu debate como presidente del Principáu. “Fizo lo correctu y ye daqué que tolos ciudadanos entienden”, concluyó Lastra.
  
Sesiones que queden
Na sesión del vienres 15 del Debate d’Orientación Política cada grupu parlamentariu va dar na Xunta Xeneral les sos opiniones y propuestes. El DOP va finar el llunes 16 col alderique de toles propuestes presentaes polos diferentes grupos parlamentarios.