Areces abre’l DOP con balance positivu de la so xestión

El Debate d’Orientación Política arrancó güei cola intervención del Presidente del Principáu, Vicente Álvarez Areces. Nél faló d’una “estraordinaria tresformación” d’Asturies con un balance positivu de la so xestión.

Vicente Álvarez Areces abrió el Debate d’Orientación Política que va durar hasta’l prósimu llunes. El xefe del Executivu asturianu defendió’l balance de la so xestión y dixo que nos últimos once años Asturies esperimentó la tresformación “más evidente” dende’l fin del franquismu.

Areces defendió qu’Asturies ye un referente n’abondos ámbitos, como na conservación medioambiental; la calidá sanitaria; la educación; les polítiques sociales; el desarrollu tecnolóxicu; o la so ufierta cultural y turística, ente otres árees. Pa él, esti ésitu vien d’una estratexa que sirvió pa “da-y la vuelta a la llaceriosa situación” qu’alcontraron los socialistes cuando entraron nel Gobiernu en 1999”.

“Asturies nun se va detener por muncho que los murnios y amnésicos s’empeñen en presentanos un panorama tristallu, que ye’l vezu del so discursu” señaló’l Presidente Areces qu’aseguró que, si nun fuera pola crisis, el balance sería más brillante.

Proyectos futuros
Vicente Álvarez Areces tamién faló d’otros asuntos rellacionaos cola axenda política asturiana. Afirmó que dedicará “cada minutu” en poner soluciones p’amenorgar el desempléu; anunció la licitación en prósimes selmanes de los accesos a la ZALIA, calificó de “progresu” l’ampliación d’El Musel y, ente otros, resaltó la “importancia de que la Unión Europea tenga una sola voz”.