Alcuentru Gastronómicu "Samartín del Pinchu"

“Samartín del Pinchu”, la cita gastronómica del fin de selmana
Dende´l vienres 15 al domingu 17 varios hosteleros de Samartín del Rei Aurelio ufierten pinchos y tapes al preciu únicu de 1,5 €

Esti fin de selmana vas tener un motivu más pa date una vuelta y facer fonda por cualquiera de los tres distritos de Samartín del Rei Aurelio. El vienres día 15 de ochobre da comienzu´l primer certame de pinchos y tapes del conceyu, nomáu “Samartín del Pinchu”. Por espaciu de tres xornaes varios establecimientos hosteleros participantes ufiertarán unes prestoses creaciones culinaries al preciu únicu de 1,5 €. Esti certame ta entamáu por ECOSAM, asociación d’empresarios y comerciantes del conceyu y patrocináu por DISCEAS.

La información de los establecimientos participantes va poder atopase nos 16 corchetes publicitarios asitiaos a lo llargo del conceyu, pero pa facilitar el desplazamientu, la llocalización y la información de los pinchos esistentes nos bares, cafés y sidreríes participantes editáronse 1.000 “gastromapes”. Amás subióse tola información tantu a Google Maps como a la web de ECOSAM, ónde ún pue descargase el propiu gastromapa en formatu virtual o en pdf.

Pa pasar una mañana o una tarde prestosa y probar toles creaciones fixáronse dos rutes, una ente Sotrondio y Blimea, y otra en L´Entregu.

Partiendo de Sotrondio, pue entamase´l recorríu saborgando’l pinchu “Espetos de xamón” del CAFÉ-BAR LA TAYUELA y nel MESÓN LA CABAÑA espéramos el “Tortu asturianu La Cabaña”. Pasando a Blimea facemos fonda na SIDRERÍA SAN MAMÉS, onde vamos probar el “Milfueya de mar y tierra” y na SIDRERÍA EL TRUS el “Espetu del mar”, y p’acabar probaremos les “Cazuelines de mortadela” nel CAFÉ LA OCA NEGRA.

La otra ruta fáese pol distritu de L´Entregu, entamando nel BAR LA GÜESTIA, cola única tapa participante, “Bacaláu al pistu de la casa”. Los “Suaños de boroña” espéranos na SIDRERÍA LA TENÁ, el “Milfueya de tortos” na SIDRERÍA LA LAGUNA DEL RÍO III y la “Tosta templada castellana” na SIDRERÍA EL ZAMORANO. Continuaremos na SIDRERIA LA CONDA probando´l “Nial asturianu” y finaremos na CERVECERÍA TOM MALORY col pinchu nomáu “Rozá Fusión”.

La cellebración d´esti certame vien a representar l´impulsu que dende ECOSAM se quier entamar a da-y a la hostelería asociada. A día de güei, esti impulsu vino cuayando dende´l branu nuna serie d´aiciones de promoción y formación, primero cola celebración d´un cursu de manipulador d’alimentos, continuando cola edición y repartu de 4000 guíes nel Muséu de la Minería pa informar al turista de “ónde comer y ónde mercar” nel conceyu y por último a primeros d´esti mes cola celebración d´un cursu de cata de vinos, aiciones toes elles de baldre pa los socios.