El Bloque refuga les nueves decisiones qu’afecten al empléu

El Bloque por Asturies refugó dos decisiones qu’afecten a la situación de la industria y l’empléu n’Asturies. Les crítiques van pal cierre y lliquidación del astilleru Juliana y el recorte nos PXE a la reactivación de les cuenques mineres.

El pasáu 8 d’ochobre celebróse una Xunta d’Acreedores na que Pequeños y Medianos Astilleros Sociedá de Reconversión SA (Pymar) desmarcóse d’un alcuerdu pasáu, que tenía l’oxetivu d’evitar la desaparición del astilleru, provocando’l procesu de lliquidación del Juliana, l’últimu astilleru que quedaba en Xixón.

El Bloque por Asturies responsabilizó a Pymar y a Graciano Torre, Conseyeru d’Industria del Principáu d’Asturies y tamién conseyeru de Pymar, como los “másimos culpables” del pieslle del astilleru xixonés.

“Lloñe de preocupase polos intereses d’Asturies, de la industria asturiana y de los trabayadores, el Conseyeru ríndese sistemáticamente a los intereses del Ministeriu d’Industria y de Pymar”, critica’l BA, que, al traviés del so diputáu na Xunta Xeneral Roberto Colunga, va pidir la comparecencia urxente y inmediata de Torre.

Amás de la explicaciones pidíes a Graciano Torre, el Bloque por Asturies tamién va plantear a tolos grupos políticos del parlamentu asturianu “la búsqueda de les soluciones necesaries y inmediates pa evitar la subasta de los bienes del astilleru, la so desaparición y la perda de más de 800 puestos de trabayu”.

Recorte a la reactivación minera
D’otra miente, la formación nacionalista d’izquierda tamién refugó el “brutal recorte” -un 44% en rellación a 2010- nos Presupuestos Xenerales del Estáu de 2011 (PXE) de los fondos destinaos a la reactivación de les comarques mineres.

“Esti recorte supón un gravísimu incumplimientu unillateral per parte del Gobiernu español de los pactos algamaos pa la reconversión minera”, criticó’l Bloque por Asturies. El BA calificó a esti fechu de “verdaderu atentáu al futuru de les Comarques Mineres” y asegura que va presentar Mociones n’aquellos Conceyos onde tenga representación institucional.