La Conseyería d'Educación presenta actividaes pal alumnáu de Llingua Asturiana

La Conseyería d'Educación acaba d'abrir el plazu p'apuntase a les actividaes qu'ufierta pal alumnáu de Llingua Asturiana nesti cursu 08/09.
Nel ámbitu de la Educación Primaria tán ufiertaos 10 conciertos del grupu Xentiquina, dando la posibilidá al profesoráu de saber con antelación el repertoriu de canciones del conciertu pente medies d'un CD cola música y les lletres de les mesmes. D'esti mou preténdese que los neños y neñes participen activamente nel conciertu con munches de les canciones que yá conocen.
D'tra miente, y como novedá pa esti cursu, preséntase l'espectáculu Asturmitomanía, tamién empobináu a los escolinos y escolines de Primaria, y que abarca diferentes representaciones teatrales que recueyen y recreen, d’una manera lúdica, les raíces mitolóxiques del pasáu xunto con temes d’anguaño, pretendiendo asina espertar l’interés de los neños y non tan neños pola nuestra mitoloxía y la nuestra cultura.
No tocante a la Educación Secundaria y Bachilleratu ufiértense 10 Conciertos Didácticos de Música Tradicional Asturiana dirixíos pola cantante de tonada Anabel Santiago, que tará acompañada pol pianista Xaime Arias. L'oxetivu de les sesiones ye esparder y promocionar la música tradicional y la llingua asturiana a partir de canciones tradicionales reellaboraes y creaes polos compositores del periodu del nomáu “Nacionalismu Musical Asturianu” (1.900 - 1.936).
 
Les solucitudes tendrán que facese llegar enantes del llunes 9 de febreru.