Pal 2011 va haber un descensu sobre'l presupuestu "axustáu" del 2010

El conseyeru d'Economía y Facienda, Jaime Rabanal, manifestó que’l Gobiernu prevé que'l presupuestu del 2011 baxe un 7% o 8% al respecto de les cuentes del 2010, una vez axustaes.

Asina'l conseyeru esplicó los diferentes motivos que favorecen el descensu. Nesti sen, destacó qu'a la cayida d'ingresos --del 7% o'l 8% al respecto de les previsiones del 2010-- únese-y la cayida de la inversión del Estáu qu'afecta al Fondu de Compensación Interterritorial; la llenda del endeudamientu y la baxada de les tresferencies del Estáu a les CC.AA.
  
En declaraciones a los medios nos pasiellos de la Xunta Xeneral, Rabanal manifestó que nes próximes selmanes van empezar a "debatir" les cuentes coles distintes conseyeríes pa poder presentales a últimos de mes nel Parlamentu. 
  
Aseguró que nun Presupuestu como'l que se fai estos años "nun hai nada intocable". Sicasí dixo que l'Executivu tien unes prioridaes claramente definíes, como ye'l gastu social, la educación o la sanidá. "De fechu, les midíes d'axuste que fuimos tomando son precisamente pa caltener estos servicios", dixo Rabanal, qu'añadió que "va haber una coincidencia" colos oxetivos d'IU, socios de Gobiernu.