Ecoloxistes denuncien “irregularidaes” en Navia

La Coordinadora Ecoloxista d'Asturies y Salternavia alvirtieron esti martes de les irregularidaes ambientales de la cantera de Braña del Río, nel conceyu de Navia y presentaron una denuncia énte instituciones públiques.

Los ecoloxistes denunciaron énte la Dirección Rexonal de Mines, la Viceconsejeria de Mediu Ambiente y la Confederación Hidrográfica “poles irregularidaes ambientales de la esplotación de la industria estractiva que s'atopa allugada na localidá de Braña del  Río".
 
"A la cantera de cuarcita concedióse-y una ampliación. A pesar del tiempu trescurríu nuna visita dende l'esterior de la zona comprobemos que resulta evidente que s'incumplen parte de les condiciones ambientales impuestes na so última ampliación y qu'ocupa más de 23.000 metros cuadraos", argumenten.

Ente les irregularidaes destaquen que "nun hai sistema dalgunu de protección de l'atmósfera"; los accesos y caminos interiores "nun tán bien pavimentaos" pa evitar les emisiones difuses y presenten una "importante precariedá"; asina como la esistencia de numberosos materiales de refugaya arramaos "ensin llugar impermiabilizáu y protexíu pal almacenamientu de los residuos oleaxinoses y con restos d'hidrocarburos de la maquinaria con un riesgu a filtrase".

Midíes del Principáu  
"Esperamos que'l Principáu esixa ensin tardanza midíes p'amenorgar el fuerte impactu ambiental de la cantera, y investigue les razones pola qu'esiste permisividá con incumplimientos ambientales nestos últimos años", conclúin