UNA acusa a PSOE y PP del fracasu de la candidatura d’Uviéu

Ignaciu Llope, voceru de Cultura d'UNA, acusó al PSOE y PP de primar los sos intereses frente a los d'Asturies, lo que llevó a la exclusión de la candidatura d’Uviéu nel procesu pa la elección de la capital europea de la Cultura nel 2016.

Pa Ignaciu Llope esti desenllaz "nun ye más que la consecuencia de la falta de visión de país que caracteriza l'aición política del PSOE y PP, que miren más a les decisiones de los sos respectivos comités centrales en Madrid, qu'a la ciudadanía que dicen representar".
  
Al traviés d'un comunicáu, el representante de la formación llamentó que "una vez más los intereses de la ciudadanía asturiana se vean tornaos poles disputes partidistes ente'l PSOE y PP, que nun son quien a ponese d'acuerdu hasta pa eventos de promoción d'Asturies".
  
Pa UNA'l fracasu de "la candidatura con más apoyu popular hasta la engarrada ente PSOE y PP" como recordó Llope, nun ye más que la consecuencia de "l'ausencia absoluta d'una visión de país que prime los intereses xenerales frente a los coxunturales y partidistes, lo que fai lliteralmente imposible qu'Asturies tenga voz propio a nengún nivel".