Arias-Cachero presenta una querella criminal por "difamaciones"

El conceyal del PP nel Conceyu d'Uviéu, José Suárez Arias-Cachero, presentó esti llunes una querella criminal contra'l primer teniente-alcalde, Agustín Iglesias Caunedo, poles "difamaciones" espresaes ayeri nuna entrevista.

Arias-Cachero, espulsáu'l pasáu 30 de setiembre del Grupu Municipal Popular, basándose nun informe del conceyal d'Economía, Jaime Reinares, nel que se pones manifiestu "irregularidaes en materia de contratación" nes árees que dirixía, apoyare públicamente la candidatura de Francisco Álvarez-Cascos.
  
Pela so parte, ayeri, la tamién edil Carmen Manjón desmarcóse de la posición del alcalde de la ciudá, Gabino de Lorenzo, y mostró públicamente'l so apoyu a una posible candidatura del ex ministru de Fomentu.
  
Arias-Cachero dixo que tien nel so poder un informe xurídicu nel que se torna cualquier niciu de delitu nes sos actuaciones al nun haber prexuiciu criminal, "anque si un error". Mientres, Caunedo, na entrevista ofrecida al diariu rexonal, calificó al edil de "corruptu"
  
El conceyal del PP señaló amás que les midíes adoptaes pol equipu de Gobiernu contra la so persona "son una desproporción tan grande que suponen un intentu de cazar al home por opinar distintu", y añadió que sigue siendo conceyal y que va siguir defendiendo lo meyor pa Uviéu y p'Asturies, porque nun ye l'equipu de Gobiernu'l que pue espulsalu, sinón en tou casu'l Comité de Derechos y Garantíes del partíu.

De Lorenzo con Espinosa
D’otra miente, l'alcalde d'Uviéu, Gabino de Lorenzo, señaló esti llunes que "l'acuerdu fácil" ente'l PP d'Asturies y el partíu a nivel estatal ye la candidatura d'Isabel Pérez-Espinosa a la Presidencia del Principáu. "L'acuerdu col partíu n'Asturies tiénenlu bien fácil, la nuesa propuesta de candidatu nun cambia, nin va cambiar, ye la que ye, Isabel Pérez-Espinosa", remarca.
     
Na mesma llinia, sobre l'apoyu al ex ministru Francisco Álvarez-Cascos mostráu polos conceyales del PP Carmen Manjón y el destituyíu José Suárez Arias, l'alcalde afirma que "eso ye frutu del Estáu de llibertaes, onde existe tamién la llibertá d'opinión y d'espresión, y caún pue dicir lo qu'entienda que tien de dicir".

De la mesma manera, De Lorenzo remarcó que "surdió esta moda que se llama agora'l 'Casquismu' y hai xente que ta a favor de qu'esti señor seya'l candidatu a la Presidencia d'Asturies". "Sosprendentemente, él tovía nun lo pidió", apunta, faciendo referencia a unes declaraciones de la secretaria xeneral del PP, María Dolores de Cospedal, nes qu'afirma  que Cascos nun-y pidió ser candidatu a la Presidencia del Principáu.

Arias-cachero lo que tien ye "mieu"
A lo último, no referente a la so relación actual col que fuere conceyal de Cultura hasta'l so cese la pasada selmana por supuestes irregularidaes, José Suárez Arias-Cachero, l'alcalde, caltién que ye "inesistente". "Nun tengo nenguna relación", remarca.
Ello ye qu'al respecto de les declaraciones del conceyal Non Adscritu sobre que nun tien "mieu" a De Lorenzo, l'alcalde d'Uviéu calca en que "igual tien tola razón, lo que tien ye mieu". "Yo que sé lo que va tener el conceyal si yo nun toi na camisa d'él", diz Gabino de Lorenzo.
  
Asina, ante la situación que la espulsión del Grupu Municipal Popular d'Arias-Cachero pue suponer pal funcionamientu de l'actividá municipal, De Lorenzo cree que nun va suponer nenguna complicación.
 
 "Otru gallu mos cantaría si en cuenta de tener 17 conceyales tuviéramos 14. Pero nun hai cosa más fácil que facer un exércitu xuntando a los descontentos, eso ye lo más cenciello. Depués esi exércitu nun va a nengún sitiu, porque esos son los descontentos eternos, los que siempre van tar descontentos", afirma.
  
De la mesma manera, al respecto de les opiniones de los que vinculen la salida d'Arias-Cachero al apoyu a Cascos más qu'a les supuestes irregularidaes de xestión, Gabino de Lorenzo afirma que "simplemente tán equivocaos".
  
"Ye un asuntu que lleva meses investigándose internamente. Ye una investigación interna del partíu y nun ye nengún inventu, dao qu'él mesmu reconoz que s'equivocó. Agora les equivocaciones puen ser de distintos tamaños y de distintos estilos, hailes que puen traer consigo otroes complicaciones añadíes. Ye un error reconocíu que vamos ver en qué queda", conclúi l'alcalde.