Yá se pue ver el mapa de foses comunes del franquismu n’Asturies

La Conseyería de Bienestar Social y Vivienda del Principáu pon a disposición pública el primer mapa de foses comunes d’Asturies al traviés de la páxina web del Gobiernu autonómicu.

El mapa rexistra 343 enterramientos espardíos per 55 conceyos, de los que 322 correspuenden a víctimes de la represión franquista y 21 a combatientes; coles mesmes 60 son individuales y el restu colectives, según información de la Conseyería recoyida per Europa Press.
   
Pal desenvolvimientu del mapa contrastáronse distintes fontes documentales y orales qu'acrediten total o parcialmente les foses, de tala forma que la iniciativa pretende cumplir colos oxetivos de la Llei de Memoria Histórica y ufiertar a la ciudadanía llocalización de foses nel territoriu asturianu.

El mapa de foses ye’l resultáu de la collaboración ente la Conseyería y la Universidá d'Uviéu, al traviés de la Facultá d'Historia, y va apurrise al Ministeriu de Xusticia pa incluyilo nel Mapa Integráu de Foses que ta ellaborando en collaboración con otres comunidaes.
  
Los espertos encargaos del proyectu estimen que más de 6.000 persones fueron asesinaes pola represión franquista, unos 15.000 son los muertos en combate y unos 2.000 los represaliaos pol bandu republicanu.   
  
Más de 3000 cadabres
Anque ye difícil dar cifres concretes sobre'l númberu de cadabres qu'hai nes foses asturianes, más de 3.000 tán identificaos y la mayoría asítiense ente los cementerios d’Uviéu, Ciares (Xixón), y en La Carriona (Avilés), como n'otros cementerios municipales.