Llingua y bioloxía améstense na Axenda Biolóxica

La Oficina Municipal de la Llingua de Xixón vien d’asoleyar l’Axenda Biolóxica, axenda escolar pal cursu 2010-2011. El cuadernu va repartise ente los casi 700 alumnos de Secundaria y Bachilleratu qu’estudien asturianu en Xixón.

“Si les primeres axendes  falaben de los díes internacionales, de les llingües del mundu, de la ecoloxía, de Xixón, de lliteratura y de l’astronomía, esti añu, declaráu añu internacional de la diversidá biolóxica, toca falar precisamente d’eso, de la bioloxía”, desplica Mª Xosé Rodríguez, responsable de la Oficina Municipal de la Llingua.

La d’esti añu ye yá la sétima axenda escolar que’l SNL xixonés edita col enfotu de “promover l’usu y conocimientu de la llingua asturiana ente l’alumnáu de secundaria y bachilleratu, al tiempu que se-yos faciliten a los estudiantes recursos pa una meyor organización y distribución del tiempu escolar”, como diz Rodríguez.

La realización d’esta axenda ta a manes de les ilustraciones de Lupe Sabugo y unos testos de Mª Ángeles García Rodríguez qu’inclúin curiosidaes sobre la botánica, los animales o’l paisaxe asturianu, ente otres coses.

Pa 700 alumnos
L’Axenda Biolóxica va repartise de baldre ente los maestros y maestres d’asturianu del conceyu de Xixón y los casi 700 alumnos y alumnes matriculaos en llingua asturiana en Secundaria y Bachilleratu nos centros escolares del Conceyu.