Cuesta: “La cultura identitaria sigue viva pesie a los nuesos gobiernos”

Daniel García de la Cuesta (Xixón, 1962) lleva más de 25 años venceyáu a la música tradicional. Pasó per bandes como Lliberdón o Beleño y anguaño toca en Zapica. Tamién ufre cursos pa esparder l’usu d’instrumentos tradicionales.

Ta acabantes d’impartir los cursos de bandurria asturiana en Xixón ¿Qué valoración xeneral fai d’ellos?
De mano, lo que toi ye sorprendíu. Afortunadamente, hasta agora, 22 persones tuvieren interés nel cursín, polo que, amás d’ampliar el cursín al 2 d’ochobre, va ampliase al sábadu 16 pa poder atender a tola xente en grupos de 8 persones, dando la posibilidá de repetir a dalguna persona.

¿Pue falanos un poconín más d’esti instrumentu?
La bandurria asturiana ye un instrumentu al que se-y dedicó mui poca atención y estudiu, y na que tovía queda munchu por facer. Ye ún d’esos tesoros que supieren caltener los nuesos antepasaos durante xeneraciones pa facemos llegar un instrumentu usáu yá na Edá Media. Podemos documentar instrumentos d’esta tipoloxía polo menos nel añu 1109. Lo curioso ye lo que mos costó, y cuesta, tirar per él pa qu’aporte a un públicu mayor, yá que ye la única manera d’espardir el so usu.

La bandurria asturiana ye un instrumentu de cuerda esfrotiada con un rabil, que tien una caxa harmónica tallada en forma de 8 y fecha d’un solu tochu de madera, lleva un pelleyu como tapa y tres cuerdes feches de tripa, que s’esfrotien al mesmu tiempu pa facela sonar. Otra particularidá ye que se toca sentáu y con ella entre les pates. Puede topase más información nesti enllaz o nos trabayos que publiqué: el llibru entituláu La bandurria y el rabel, y el cd Cantares de bandurria.

Na so páxina web podemos lleer que’l prósimu 16 d’ochobre va dar otra vuelta un cursín bandurria asturiana. Paez qu’esiste un reclamu p’afondar nel conocimientu de los instrumentos tradicionales asturianos…
Pues sí, como se comenta na páxina el cursín tuvo d’ampliase a una tercer sesión p’atender a la xente, y paezme un bon momentu pa pegar un tironín nesti tarrén. Ye l’intre d’echar andar un movimientu qu’arrexunte tantu l’interés de los y les bandurrieres yá iniciaes y de les persones que quieren entamar, como’l de los artesanos y tamién el de la xente que programa actividaes culturales. Tien d’haber más información sobre ello y lo demás dirá viniendo.

¿Tien en mente nuevos proyectos rellacionaos col deprendimientu d’instrumentos tradicionales?
Too esto va facer que siga trabayando a lo llargo’l tiempu con más actividaes al rodiu d’esti instrumentu, como clases, conciertinos, alcuentros de músicos y lutiers, participación en festivales, etc…, d’equí al prósimu veranu. Polo que’l futuru ye mui granible nesti sen. Arriendes, noté a la xente con munchu enfotu n’apautase a la  recuperación de la bandurria, tantu en deprender a tocala como hasta en facela, lo que fai barruntar un espoxigue curiosu nesti tarrén d’equí a pocu. De too diremos dando información puntual a www.asturies.com, a la qu’agradezo abondo l’enfotu mostráu.

Tamién toi trabayando n’otros campos d’investigación musical, sobre tou nun llibru sobre les gaites, en xeneral, y nuna auténtica ayalga, l’apaición d’un instrumentu de percusión desconocíu hasta agora n’Asturies, la tabla tañida, que trairá munches sorpreses pa los percusionistes asturianos. Anque too lleva munchu trabayu y tiempu.

¿Qué opina de les infraestructures esistentes anguaño pa que la xente puea averase a esti tipu d’instrumentos?
Como ye un instrumentu pocu conocíu, necesita d’espacios onde espardese, sicasí nun tien presencia nes escueles de música tradicional y tampoco hai muncha xente que puea deprender a otros curiosamente. Hai que decatase qu’a mediaos de la década de 1990 morrió’l bandurrieru caberu, qu’aportamos a los datos polos pelos, y que se lleva un tiempu investigando pa saber que facer cola bandurria, yá que nun val tocar cualaquier cosa nella si se quier tener un filu conductor cola tradición y col repertoriu que se caltién. Facer eso llevó, y sigue llevando, tiempu y munchu, munchu trabayu, viaxes, hores d’entrevistes, etc. Asina que tamién tendrémos que crear los espacios per onde se dea a conocer la bandurria tovía más, tiempu al tiempu.

Sí que toi sorprendíu de qu’hai munches más bandurries de lo que paecía, que taben paraes en manes de xente con enfotu pero que non se decidía a ponese per ella, agora paezme que tá cambiando l’asuntu, afortunadamente, y eso va llevar a muncha más xente detrás. Esto ye mui prestoso pa mi, tenía ganes de sentir una rempuesta d’estes carauterístiques.

Per otru llau, usté lleva yá más de 25 años trabayando na música tradicional ¿Qué gracies y desgracies tien esti mundu? ¿Cómo ta lo de poder vivir n’Asturies de la música tradicional asturiana?
Yo nun sé si ye una necesidá vivir de facer música tradicional, yo sí que noto la necesidá de vivir na música tradicional, y eso, col tiempu, pue dar en trabayos que tengan un rendimientu económicu suficiente como pa poder dedicar tol tiempu que quieras a investigar, deprender, tocar, participar de grupos, de conciertos y que compense. Yo conozo dellos músicos asturianos que viven tantu de la música tradicional como na musica tradicional, asina que sí que se pue vivir d’ello, si te lo plantees y tienes los conocimientos afayadizos. Afortunadamente, el fechu de la esistencia d’escueles de música ye porque hai una demanda social y eso fai qu’esistan puestos de trabayu. Camiento que tovía podía ser mayor l’emplegu nesti tarrén cultural.

¿Y en comparación con otros llugares más cercanos por cultura y prosimidá a Asturies?
Atalanto que, a pesar de los gobiernos que tenemos, la cultura identitaria sigue viva, precisamente porque ye daqué mui cercano, que tien muncha fuercia que somos capaces de tresmitir con ciñu, inclusu de contaxar con ello a otra xente que, bien yá perdió una identidá o cenciellamente presta-y sentir esi ciñu porque ye mui humano. El fechu de que to pá, o’l to güelu, tocara la gaita, que daquién de la familia tocara la pandereta o te cantara cosines de neñu, sirvió pa mantener nel tiempu un gustu polo nueso que fai que nun tea too perdíu. De fechu, enxamás hubo tanta xente enfotada en tocar, baillar o conocer meyor la cultura tradicional asturiana.

Lo qu’anantes fueren vivencies sociales que diben formando una cultura nun ámbitu más bien rural, cambiaron, pero ¿Nun siguen siendo vivencies sociales d’anguaño'l dir a deprender a tocar? ¿A dir a una espicha y cantar?, ¿A echar un bailín nun conciertu? Esti ye l’entornu social que mos tocó, más urbanu pa muncha xente, y la música tradicional sigue valiéndomos pa entretenenos, conocenos, disfrutar, llorar y reinos con ella, por eso sigue viva, y seguirá. N’otros territorios cercanos cuando miren p’acá, non dan creditu a que tanta xente mozo s’involucre na música tradicional, pero en cuantes a un sofitu políticu, somos nós los que naguamos por velo ameyorar.

A lo llargo de too esti tiempu ¿Qué pue dicir de la evolución de la música tradicional dientro de les nueses llendes?
Esta entruga da pa unes xornaes, yá que dende mediaos de la década de 1970 p’acá, qu’amás tocóme vivilo, hubo munches novedaes, modes, llínies de trabayu y recuperación, y tamién se siguió un llínia más apegada a lo que mos tresmitieron los nuesos güelos y güeles. La xente decide qué caminos garrar por munchos motivos, y tamién desdexalos, el tiempu va amosándonos esos cambios y gustos que podemos observalos namás que cola distancia. Cuanto más se conoza lo que realmente ye la tradición, meyor sabremos respetala y tresmitila. Lo qu’anguaño conocemos como tradición básase no que convenimos en que mos trasmitió la xente que vivió n’Asturies nos doscientos y picu años caberos, más atrás yá non tenemos claro si hai que recuperalo como tradicional o non. Si pal futuru non dexamos mui claro que yera lo tradicional pa nós, ye cuando podemos romper col filu tresmisor y perder la llínia que mos une realmente cola cultura que decimos querer.

Usté ye partidariu del rexistru de pieces musicales n’entidaes de xestión de derechos d’autor ¿Por qué? Hai xente qu’argumenta qu’esto torga l’espardimientu y conservación de la nuesa tradición sonora…
Curiosamente, la xente paez desconocer como furrulen dalgunes entidaes de xestión de derechos d’autor y como son los distintos tipos de rexistros qu’esisten. Cualquier persona y empresa discográfica qu’edita un discu, tien de pagar una parte a esti tipu d’entidaes, que si nun sabes como reclamala, va pa una bolsa que se reparte ente los socios que más xeneren, polo que dexalo correr, o non, ye cosa de caún. Lo mesmo cuando estes entidaes recauden perres pol usu de les grabaciones y temes rexistraos en medios de comunicación y otros llugares. La mayoría de persones y grupos qu’editen trabayos tienen rexistru del so trabayu, yo conozo munches, y sinón, piérdenlo en porgüeyu d’esos socios. Non me gusta como se xestionen, en xeneral, esos drechos nin dalgunes maneres de recaudar, que paecen salíes de grupos mafiosos y que deberíen ser illegales, pero dexalo pa prau nun me paez afayadizu, polo que procuré, dende hai casi 30 años, tener en cuenta como furrula tou esi procesu, al igual qu’otra muncha xente.
 
Home, hai xente pa too, pero desconozo qué tien que ver el rexistru d’una composición propia o los arreglos d’un cantar, col espardimientu y conservación de la nuestra tradición sonora. Del Asturies patria quería, hai un cientu de rexistros y ehí tá.

P’acabar. La Conseyería de Cultura ta acabantes de refugar qu’Asturies seya la capital del Festival Intercélticu de Lorient de 2011 ¿Qué facemos cola política cultural del Gobiernu d’Asturies?
La política cultural del gobiernu asturianu ye la de tratanos d’indíxenes na nuesa tierra. Tolo que non seya invertir, polo menos, el 51% d’un presupuestu de cultura na cultura asturiana, ye una política de xenocidiu cultural, y fecha aposta. Yá vien de vieyo que la mayoría de xestores culturales desconocen qu’esiste una cultura asturiana y asina difícilmente puede facese nada por ella. Munches vegaes muévese pela moda del momentu, o los amigos que tengan, si pinta. Insisto qu’a pesar de les polítiques culturales que venimos padeciendo dende mediaos de los setenta, la xente supo pasar penriba d’ello y salir p’alantre, eso si, a cuenta de poner el llombu, trabayar y xenerar actividá como fuere.

A mi tocóme, como invitaos tovía d’aquella, dir per primer vegada al festival d'An Orient, preciosu escaparate onde se mos trataba y trata como lo que somos, asturianos. Y costóme tiempu y perres, y díbemos encantaos. El tiempu y el trabayu de munchos músicos y persones, como Lisardo Lombardía, ficieren posible l’asistencia oficial a esi festival célticu. Curiosamente, mentantu munchos músicos tradicionales punxeren muncho de la so parte durante munchos años porque too saliere lo meyor posible nesti festival, cuando hubo perres, el representante más celta que fue, yera Vitor Manuel. Quiciabes agora tamién pueda echar un gabitu nesti tema y trabayar pa que les coses cambien. Los asturianos nun tenemos lo que mos merecemos, asina que, a ver si somos quien a tomalo, mentantu, seguiremos trabayando a pesar de los gobiernos que mos toquen.