Denuncien énte’l TC la “deucracia” na Procuradora Xeneral

El Conceyu por Otra Función Pública n´Asturies presentó un recursu d´amparu al Tribunal Constitucional, tres que s'archivara un pidíu d’investigación solicitáu que denunciaba la “deucracia” na Procuradora Xeneral.

La denuncia presentada pol Conceyu por Otra Función Pública n’Asturies alvertía que, dempués de cinco años de funcionamientu, la Procuradora Xeneral de la Xunta Xeneral del Principáu d’Asturies nun ficiere nenguna convocatoria pública pa la escoyeta del so personal, de mou que la totalidá de la plantiya alcontrábase colocada a deu.

La denuncia foi archivada y por ello l’asociación denunciante presentó un recursu d’amparu énte’l Tribunal Constitucional contra la decisión de la Comisión de Pidimientos y Rellaciones d’archivar el pidíu d´investigación de la xestión del personal de la Procuradora Xeneral.

“L’archivu de la denuncia per parte de la Xunta Xeneral del Principáu, tres “tomar nota” de la mesma, supón un tapecimientu dafechu de les males práutiques alministratives de la Procuradora Xeneral” denuncien dende’l Conceyu por Otra Función Pública. Amás señalen a PSOE, PP y IX como responsables por actuar “con una percuriosa unanimidá”.

“Tal paez que los representantes del pueblu asturianu nun queríen oyer de viva voz que la institución de la Procuradora Xeneral tenía suspendíu´l derechu fundamental d´aportar a los puestos públicos en condiciones d’igualdá”, continúa criticando l’asociación denunciate, qu’añade que “, l´archivu de la reclamación pon n´evidencia'l despreciu de los parllamentarios pol propiu Reglamentu de Funcionamientu de la Xunta Xeneral”.

“Deucracia”
Según el Conceyu por Otra Función Pública n’Asturies, la plantiya de personal de la Procuradora, espublizada nel BOPA de 27 de setiembre, “de 18 puestos de trabayu, 15 nómense pol procedimientu del deu”.