Arias-Cachero diz que la so destitución ye una "gochada"

El conceyal destituyíu del Ayuntamientu d'Uviéu José Arias-Cachero, dixo güei que se siente víctima d'una "gochada" y que la so destitución débese al fechu d’apoyar públicamente a Álvarez-Cascos como candidatu del PP a Asturies.

Dixo que la llibertá d'espresión ta protexida polos estatutos del PP, como ficieron líderes del partíu como Esperanza Aguirre o Esteban González-Pons (que tamién valoraron la figura de Cascos) y que por eso va enviar una carta solicitando amparu al presidente del Comité de Nacional de Derechos y Garantíes del PP, Alfonso Fernández-Mañueco, y a la vicesecretaria d'Organización del PP, Ana Mato. Afirma que la so destitución ye un "vergonzosu montaxe" y un "actu de represión" nel que nun tuvo nin imputación nin opción a defensa.
  
Asina se pronunciaba nuna rueda prensa ofrecida nel Conceyu d'Uviéu, na que calcó en que se sigue sintiendo militante del PP, manifestando'l so respetu polos órganos del partíu y el so "arguyu" de pertenecer a esa formación política.
  
A pesar de que les razones qu'argumentó la destitución débese a importantes irregularidaes en materies de contratación, Arias-Cachero refugó esa xustificación. La verdadera razón del so cese, apuntó, ta na carta abierta a Rajoy, que publicó nel periódicu El Mundo esti llunes, y na que mostraba'l so apoyu a Cascos, una posición que nun coincide cola posición que defende Gabino de Lorenzo d'apostar pola tamién conceyala d'Uviéu, Isabel Pérez-Espinosa pa la candidatura d'Uviéu.
  
A partir de la publicación d'esa carta, dixo que nel Conceyu dedicáronse a examinar distintos espedientes non sólo relativos a la so persona, sinón tamién a la so familia, col únicu oxetivu "d'estroza-y la vida".
  
Arias-Cachero estimó les numberoses llamaes d'apoyu recibíes nes últimes hores, igual que les que tuvo cuando se publicó la carta.
  
Esplicó que na xunta d'esti xueves, cuando se-y comunicó la so destitución nuna xunta nel Grupu Municipal, namás una conceyala nun tuvo acordies con la mesma. Sicasí, señaló que "entiende" la situación del restu de compañeros, puesto que si muestren otra posición podría pasa-yos lo mesmo. Trátase d'una cuestión de "valor", según Arias-Cachero. Otros conceyales manifestáron-y darréu, y en privao, el so apoyu.
  
Pero lo que nun entiende Arias-Cachero ye la posición de la posible candidata del PP d'Asturies, Isabel Pérez-Espinosa, que tamién ye conceyala y qu'optó pola so destitución. El conceyal aseguró qu'apeló a la so persona, dada la so posición, pero qu'Espinosa escuchóla "impertérrita". Trátase d'una manera d'actuar que "desautoriza" a Espinosa porque, según Cachero, demuestra que nun ye a defender un proyectu propiu nin d'actuar de manera independiente.
  
Preguntáu sobre la posición del PP d'Asturies nesti asuntu, nun dudó n'afirmar que la dirección asturiana del PP "ta secuestrada" y que nun actúa de forma independiente. "Falo de líderes, dígame qué líderes hai na dirección rexonal", apuntó.
  
Caltuvo'l so apoyu a Cascos porque ye "lo que piensa tola ciudá" y porque foi ún de los principales responsables de que la derecha algamara alzase col poder n'España. Agora, dixo, ye'l momentu pa qu'asoceda algo paecío n'Asturies con Cascos al frente. Preguntáu por si'l mesmu Cascos lu llamare tres conocese la so destitución, Arias-Cachero nun lo esclaró. Na mentada carta del llunes, Cachero yá señalaba que la so opinión nun diba sali-y gratis.
  
Per otru llau, Cachero tamién comentó que'l fechu de que la so destitución conociérase xusto'l día que se producía la noticia de que la ciudá Uviéu quedare escluyida de les ciudaes candidates a ostentar la capitalidá cultural europea nel 2016, "nun ye algo casual" y que tamién busca "tapar" esi "fracasu llamentable".

Error alministrativu
El conceyal esgranó les "supuestes irregularidaes" qu'argumenten los responsables de la so destitución, almitiendo que cometió un "error alministrativu" qu'asume. Asina, dixo que hai poco más d'un añu, revisando un presupuestu paeció-y esaxeráu'l dineru destináu a treslladar de Madrid a Uviéu'l vestuariu d'una zarzuela. Asina, decidióse a facilitar a los responsables el teléfonu d'una empresa de mensaxería, na que'l xerente yera un cuñáu suyu. "Yera más económica", señaló.
  
Nesa empresa tenía un 15 por cientu de participación l'hermanu d'Arias-Cachero. Nel desglose, realizáu por Arias-Cachero, de cantidaes que fueron pa la entidá inclúinse 274,27 euros nel 2010 de la Sociedá Uvieína de Festexos; 40,50 euros y 57 euros nel 2009 y 2010 respectivamente de la conceyalía de Turismu; 4.452 euros y 5.219 euros de la conceyalía de Cultura, de los que prácticamente la metá ye pa tresllaos del mentáu vestuariu. "Almito que puea cometer un error alministrativu, pero sométome a cualquier tipu d'analís comparativu pa ver qué yera lo más económico", dixo.
  
Pero amás dixo que responsables del Gobiernu llocal tuvieron tamién estudiando otru tipu d'espedientes relativos a la so familia, que cuenta con actividaes empresariales. Asina, esplicó que nos últimos meses una sociedá familiar de la que ye sociu mercó una parcela nuna zona céntrica d'Uviéu y permutó una parcela con Cinturón Verde. "Sé que tamién tuvieron mirando con lente eso", comentó.

"Gabino, nun te tengo mieu"
"Gabino, nun te tengo mieu", señaló en referencia al alcalde de la ciudá, Gabino de Lorenzo. "Tengo razones pa nun tener mieu", prosiguió'l conceyal, que d'equí p'arriba pasa a ser non adscritu. Preguntáu por si esa frase podría interpretase como que tenía información comprometedora relativa al alcalde y al so entornu, Arias-Cachero llendóse a contestar qu'eso "ta diciéndolo usté".
  
Pese a tola situación, Arias-Cachero aseguró que sigue sintiéndose militándose del PP y que va siguir atendiendo nel Conceyu la disciplina y les llinies maestres del equipu de Gobiernu, de signu popular. "Confío n'Uviéu y nel PP", manifestó.