Ochobre abre con actividaes d’ociu venceyaes a la cultura asturiana

A los que nun tengan planes pa esti fin de selmana espéra-yos una montonera d’actividaes venceyaes a la cultura y historia del país. Na nuestra estaya de convocatories puen informase.

Música
La música asturiana va ser una de les protagonistes estos díes 1 y 2 d’ochobre. Per un llau, esti vienres va haber una sesión folk a manes d’Alberto Ablanedo, Dolfu R. y Rubén Bada n’El Cafetón d’Avilés; mentantu que’l grupu punk-rock Misiva va presentar n’acústicu el so últimu discu “Parte de la solución” en La Palmera de L.lena.

D’otra miente, el sábadu 2 tamién va espardise’l son del país per Xixón y Uviéu. Na villa de Xovellanos el músicu asturianu Daniel García Cuesta va impartir un cursu de bandurria asturiana, mientres que n’Uviéu el Partíu Asturianista celebra los sos 25 años d’historia con un conciertu de Tuenda.

Destaca tamién pa esti primer sábadu d’ochobre el II Alcuentru de Pandereteres y Música Tradicional de Llaviana, que va llevar pandereteres asturianes, cántabres y murcianes –amás de folixa y gastronomía- a La Pola Llaviana.

Gastronomía
Los que-yos preste’l bon comer tienen una cita en Morcín el sábadu 2. El III Certame del Gochu AsturCelta va xirar alrodiu esti animal autóctonu. Amás hai 120 kilos de picadillu pal so repartu gratuita.

Senderismu
Importante tamién la ruta per enclaves de la Guerra Civil que va percorrer el conceyu de Les Regueres. Si te presta la historia y el senderismu el sábadu 2 pela mañana sal d’Uviéu esti recorríu históricu.