Correa acusa a la oposición del "intentu de golpe d'Estáu" n'Ecuador

El presidente d'Ecuador, Rafael Correa, acusó a la oposición de tar detrás del intentu del golpe d’Estáu que lu tuvo reteníu per delles hores nun hospital de la Policía Nacional en Quito.

En concreto, el mandatariu ecuatorianu apuntó al ex presidente Lucio Gutiérrez, que foi derrocáu n’abril de 2005 por una revuelta popular, como organizador de lo que calificó como "un intentu de golpe d'Estáu". L’opositor Gutiérrez, tres de los fechos, pidió amás la disolución del Parlamentu y elecciones anticipaes.
  
"Esperaben crear un bañu de sangre. Que se maltratare al presidente, que lu secuestraren, que lu trataren de rescatar y qu'entós se cubriere de sangre'l suelu ecuatorianu, pa tratar de desestabilizar al Gobiernu y d'esa manera ganar lo que nun puen ganar nes urnes", indicó Correa na so primer rueda prensa dempués del incidente, celebrada hora y media dempués de tornar al Palaciu Presidencial tres de que lu rescatare l'Exércitu.
  
"Lo qu'asocedió na xornada de güei foi un intentu de conspiración perfectamente coordináu, por exemplu, col zarru del aeropuertu y la toma de repetidores de les canales (de televisión) del Estáu", indicó. El presidente ecuatorianu dixo amás que l'intentu de golpe na so escontra "fracasó, pero obviamente dexó cicatrices que van tardar enforma en zarrar".
  
Correa afirmó que tolos axentes  policiales que participaron na sublevación van sufrir sanciones de forma correspondiente y anunció una "fonda depuración" na Policía Nacional. "Equí nun va haber perdón nin olvidu porque perdón y olvidu, a nivel social, ye lo más asemeyao qu'existe a la impunidá".
     
El presidente ecuatorianu estimó la llealtá de la so guardia personal, de les Fuerces Armaes que lu rescataron, de los medios de comunicación estatales y de los miembros del so Gobiernu. Toles instituciones del país, incluyida la cúpula militar y el poder llexislativu, salieron en defensa del orden constitucional, del Gobiernu llexítimu y del presidente Rafael Correa.

El desendolcu de la sublevación
Lo qu'a primera hores de la mañana presentóse como una protesta de policíes y militares contra la Llei de Serviciu Públicu, que contempla una homologación de los xornales de los oficiales, demostróse poco dempués como un intentu de golpe d'Estáu. Correa afirmó que yera «una maniobra d'oposición y grupos enquistaos en Fuerces Armaes y Policía», cercanos a Sociedad Patriótica del ex presidente Lucio Gutiérrez.

A primer hora de la mañana, militares tomaron l'aeropuertu de Quito –y más tarde otros– y policíes entraron na Asamblea Nacional, onde torgaron l'accesu de los diputaos. Correa foi a dialogar con ellos al Reximientu Quito I.

Tres intentar dialogar con ellos aseguró que non claudicará nos sos principios pese a los intentos d'agresión contra'l so Gobiernu y contra él mesmu, como más tarde se evidenció. Correa sorrayó que «yo nun voi dar marcha tras, si quieren vengan buscame acá, denme un tiru y que siga alantre la República».

Ellí, los sublevaos cutieron al presidente llexítimu, que tuvo qu'ingresar nel Hospital de la Policía tres vese afectáu polos gases lacrimógenos que-y llanzaron. Una vegada ingresáu, policíes y militares aislláron-y nuna habitación y torgáron-y salir, reteniéndo-y pola fuerza.

En sabiendo qu'el so presidente permanecía secuestráu nel centru hospitalariu, miles de persones de toles edaes que s’axuntaren frente al Palaciu Presidencial dirixiéronse hacia ellí col enfotu de rescata-y. Fueron reprimíos con gases lacrimógenos y dellos disparos, según informó Telesur, pero lloñe d’amedranase, siguieron avanzando y consiguieron romper el cercu. A la fin, l’exércitu rescató al presidente electu.

Reacciones institucionales
Gobiernos y organismos rexonales y internacionales salieron en defensa del Gobiernu llexítimu y l'orde institucional, anque non toos falaron de golpe d'Estáu. Reaccionaron, ente otros, l'ALBA, Unasur y la OEA.

La reacción de la Casa Blanca, bien esperada, nun foi mui estremada de l'amosada tres el golpe d'Estáu en Honduras, en xunu de 2009. EE.XX Dixo sofitar a Correa y «refugar cualquier violencia», amás de llamar al diálogu.