Asturies foi la comunidá que más siguió la Fuelga Xeneral

Los secretarios xenerales d'UXT, CC.OO y USO d'Asturies, Justo Rodríguez Braga, Antonio Pino y Félix Baragaño, cifraron el siguimientu de la Fuelga Xeneral n’Asturies nun 87%, la comunidá autónoma col datu más eleváu.

En rueda prensa, Pino comparó la cifra de la comunidá col 71,7 por cientu de media nacional  y destacó que se trata d'un "atayante ésitu",  avaláu amás pola cayida del 25 por cientu del consumu eléctricu, según datos de Rede Eléctrica Española recoyíos poles organizaciones sindicales.
  
Al so xuiciu, la respuesta de los trabayadores, a los qu'animó a sumase a la manifestación d'esta tarde, "obliga al Gobiernu a rectificar y a recuperar el so perfil progresista y socialdemócrata", porque, de lo contrario, "van siguir movilizándose", alvirtió.

Un deteníu
Pela so parte, el voceru d'UXT Asturies destacó que'l paru trescurrió "con toa normalidá y sin elementos dignos de mención", sacante un deteníu a primer hora de la mañana na cai Gil de Jaz, n'Uviéu, al que "zurraron bien" y que yá ta en llibertá.
  
Pa Rodríguez Braga la güelga foi "especialmente relevante" en sectores industriales y de serviciu a la industria y "importante" nel comerciu y l'Alministración, con cifres que superen les del 2002. Amás apuntó que la parada foi "total" nes empreses cementeres, Arcelor y Alcoa.
  
Asina, UXT apuntó que se trata de "un puntu y final a les midíes regresives del Gobiernu pa recortar derechos y xornales" y pidió que se potencien los servicios públicos y que s'adopte un sistema impositivu nel que paguen más los que más tienen. "Nun hai resignación, hai movilización porque tenemos razón", sorrayó.
  
A lo último, Francisco Baragaño, d'USO, valoró la unidá sindical y criticó la presencia de "agresivos piquetes empresariales" qu'amenacen cola non renovación de los contratos. "Si nun se rectifica vamos siguir na llucha", dixo.
  
Pa les trés organizaciones convocantes el potencial de fuelga foi superior al del 2002, colo que se dio un exemplu de que cola movilización les coses "puen y van cambiase". "La fuelga satisfizo les mires que plantegáramos", acabó Rodríguez Braga.

FADE acusa a piquetes
Pela so parte, el secretariu xeneral de FADE, Alberto González, acusó esti miércoles a los denominaos piquetes "convencitivos" de torgar a miles de trabayadores del Principáu acceder a los sos puestos de trabayu.
  
Nunes declaraciones, nes que refugó valorar la repercusión del paru, dixo qu'a primer hora de la mañana l'actividá de los piquetes centróse nel corte de carreteres, accesos a polígonos industriales y a centros de distribución de mercancíes, asina como a les estaciones d'autobús y tren, "torgando con ello'l llibre desplazamientu de los asturianos".
  
González aseguró qu'a lo llargo de la xornada munches empreses dirixiéronse a la patronal pa comunicar que nun pudieren abrir les sos instalaciones "por cuenta de la presión" de los manifestantes o porque se torgó'l normal accesu de los trabayadores. Al so xuiciu, too ello causó "importantes retrasos na abertura de les mesmes", pero "a midida que foi pasando la mañana l'actividá empezó a normalizase".

Sin incidentes
El delegáu del Gobiernu, Antonio Trevín, manifestó que'l día trescurrió con "cierta normalidá" y cola ausencia d'incidentes importantes, nun siendo'l tresporte.
  
Trevín, nuna rueda prensa na Delegación del Gobiernu pa realizar un primer balance de los efectos de la Fuelga Xeneral n'Asturies, señaló que'l día trescurre con "cierta normalidá" con garantíes de servicios básicos pa la ciudadanía, sobremanera n'educación y sanidá.
  
Manifestó que se tán respetando con "bastante normalidá" los servicios mínimos pactaos colos sindicatos en ferrocarriles y n'aviación y destacó que la mayor alteración ta nel tresporte per carretera tanto de mercancíes como de viaxeros, tanto urbanos como interurbanos.
  
Trevín añadió que nun se produxeron detenciones a lo llargo de la mañana anque si señaló que si hubo dellos identificaos, ún n'Uviéu y otros en distintos puntos d'Asturies, por producir cortes de carreteres cola quema de contenedores y neumáticos.