El mercáu de la música online n'España ye entá pequeñu

El mercáu de distribución de música online supón 300 millones d'euros en Reinu Uníu. N'España ye namás el 3% d'ésti. Asina lo afirmó'l subdireutor xeneral de la Sociedá Xeneral d'Autores y Editores (SGAE), Pablo Hernández.

Mientres una mesa redonda sobre propiedá intelectual n'Internet que valió de presentación pal segundu Llibru Blanco del ICOMP (Iniciativa por un Mercáu Online Competitivu), Hernández realizó una comparanza ente la situación del mercáu dixital de la música n'España col d'otros países de la so redolada.
  
Asina, según les cifres apurríes pola SGAE, el mercáu dixital de la música n'España representa sólo'l 3% del inglés, el 6% del alemán o'l 16% del francés.
  
"Europa empieza a cambiar y tamos quedando a lo último d'esi cambiu", apuntó Hernández, dempués de lo qu'alertó de qu'esto pue traducise na ausencia d'inversión. Nesti sen, l'espertu alvierte de que si nun hai inversión, va perdese nuevu talentu que nun va atopar la manera de llegar al públicu.
  
Hernández recordó tamién como'l sector de la música ye, a día de güei, namás un 28 por cientu de lo que yera nel 2001, exemplu, na so opinión, del impactu de les nueves tecnoloxíes nel sector de los conteníos.
  
"Cada añu entren na SGAE más de 3.000 nuevos creadores que, sicasí, enfréntense a un mercáu que nun-yos ofrez canales pa llegar a los sos públicos", señaló, "lo qu'acabará por afectar a les industries culturales y a la mesma marca d'España".