IX demanda firmeza pa defender la supresión del peaxe del Güerna

El Coordinador Xeneral d'IX d'Asturies, Jesús Iglesias, consideró, al respecto de la non inclusión de la supresión del peaxe del Güerna, que'l Gobiernu estatal nun pue cambiar una orientación política apoyada pola mayoría de la Xunta Xeneral.

La supresión del peaxe ye un compromisu del Presidente Zapatero que suponía namás reconocer la situación de discriminación que viven los asturianos, obligaos a pagar un peaxe pa utilizar la meyor conexón cola meseta y la única en determinaes condiciones meteorolóxiques pel iviernu.
  
Iglesias recuerda qu'otres comunidaes autónomes vieron como les sos conexones per autovía realizáronse munchos años antes y algunes llograron nel tiempu trescurríu trés el compromisu de Zapatero que los sos peaxes s'eliminaren. "El Gobiernu d'Asturies tien que defender con firmeza que se produza esti rescate", asegura'l Coordinador Xeneral d'IX.
  
Pa Iglesias el fechu de que s'evaporare la coartada que'l Ministeriu de Fomentu intentó utilizar pa xustificar que nun s'avanzare na supresión del peaxe, la segunda autovía a partir de La Robla, dexa n'evidencia que se trataba namás d'un señuelu y nunca hubo nin recursos nin intención de llevar a cabu medida asemeyada.
  
Jesús Iglesias resalta que resulta "igualmente" desafortunada la decisión de renunciar a incluyir nel PEIT el túnel del Fitu, dexándolo al albur de la hipótesis d'un conveniu específicu difícilmente creíble nuna situación d'axuste na que, evidentemente, van ser prioritarios les infraestructures contemplaes nel PEIT.

Sobre los Presupuestos
Per otru llau, l'acuerdu sobre los presupuestos, algamáu pol PSOE colos nacionalistes vascos y con Coalición Canaria, eleva les sos dudes sobre la garantía de que se conseñen les partíes necesaries pa executar les inversiones previstes pal 2011 na autovía del Cantábricu y na alta velocidá, según Jesús Iglesias.
  
Como yá asocedió n'ocasiones anteriores, el grupu parlamentariu d'IU va presentar, si nun s'inclúin estes partíes, enmiendes a los Presupuestos Xenerales del Estáu coles mires de compensar les ausencies que se produzan.