Diputaos autonómicos apoyen la fuelga y donen perres d'esi día

Cuatro diputaos de la Xunta Xeneral del Principáu d'Asturies van secundar la fuelga del 29 de setiembre y van destinar la retribución parlamentaria d'esi día a distintes causes. Son diputaos d’IU-Los Verdes y del Bloque por Asturies.

Los diputaos de la Xunta Xeneral del Principáu d'Asturies nun puen ponese en fuelga como tala, al nun tener una relación contractual cola institución. D'esta manera, los parlamentarios que faigan fuelta d'IU-Los Verdes, Jesús Iglesias, Diana Camafeita y Emilia Vázquez; van repartir la parte económica correspondiente al miércoles a distintes causes que tovía nun especificaron.
  
Algo asemeyao va asoceder col diputáu del Bloque por Asturies y portavoz del Grupu Parllamentariu Mestu, Roberto Colunga, que tampoco va acudir el miércoles pa nada a la Xunta Xeneral del Principáu, dao que va participar nes distintes movilizaciones, y que tien previsto destinar el dineru d'esi día a la caxa de resistencia de los trabayadores de Venturo XXI.

Mentanto, les fontes consultaes por Europa Press de los grupos parlamentarios de PSOE y PP, fuerces que nun apoyen la convocatoria, señalaron que los sos diputaos tienen previsto exercer la so actividá como cualquier otru día.