Arias-Cachero pide a Rajoy que Cascos seya'l candidatu

El conceyal de Cultura d'Uviéu José Suárez Arias-Cachero desmarcóse de la posición del alcalde, Gabino de Lorenzo, y pidió públicamente a Mariano Rajoy que se decida por Francisco Álvarez-Cascos como candidatu n'Asturies.

Nuna carta abierta a Rajoy que publica güei'l periódicu El Mundo, recoyida por Europa Press, Arias-Cachero diz que la xunta del vienres na que dellos cargos públicos del PP, incluyíu De Lorenzo, propunxeron a Isabel Pérez-Espinosa como candidatu, prodúxose "al marxe de los órganos del partíu".

El conceyal señaló que considera a Gabino de Lorenzo l'alcalde "más estraordinariu", pero esplicó que nun comparte la so oposición sobre que Cascos seya'l candidatu. Al so xuiciu, el PP d'Asturies tien qu'algamar la mayoría absoluta y pa ello tien que tener al frente a alguién que puea llogralo.

"Creo que Pérez-Espinosa, a la qu'aprecio, nun puede comparase con Álvarez-Cascos", manifiesta Arias-Cachero. "La nuesa ye una sociedá encoyida na que sé que nun me va a salir de baldre espresar esta opinión", añade.

Cambiar Asturies
Recuerda a Rajoy que Cascos foi ministru con él nos gobiernos d'Aznar y que contribuyó a "cambiar" España. "Agora ye'l momentu de cambiar Asturies y munchos  asturianos, non sólo del PP, pensamos que pue liderar la mayoría necesaria pa ser el motor d'esi cambiu", asegura. "La victoria de Cascos n'Asturies sería un presaxu emblemáticu pa la victoria de Mariano Rajoy n'España", acaba.