Xeira convoca el XX Premio Xeira de Narracióis Curtias

L’asociación cultural del Eo-Navia Xeira, convoca otru añu más el concursu más conocíu y antiguu de lliteratura en gallego-asturiano. Amás esti añu, el Premio Xeira de Narracióis Curtias destaca por llegar a la so XX edición.

Col enfotu de promocionar el gallego-asturiano na so espresión culta, Xeira escomenzó a organizar va venti años esti concursu de narraciones curties. Pola mor d’ello, l’asociación llama a participar a tola xente “interesada en fer una lliteratura na llingua dos conceyos máis occidentales d’Asturias”, destacando los venti años de trayectoria.

El plazu d’entrega de les creaciones en prosa han de mandase enantes del 15 de payares, siguiendo les bases recoyíes na web de l’asociación cultural. El premiu al ganador va ser de 600 euros. Xeira tamién avanza que pa festexar l’aniversariu tán “amañando dalgúas actividades das que s'ha a dar noticia d'aquí a pouco”.

Venti años de premiaos
Ente los premiaos nes postreres ediciones, tán nomes como Manolo Galano, Alejandro Antúñez, Jacinto Díaz, Fredo de Carbexe, Rafael Cascudo, Xaviel Vilareyo, María José Fraga, Aurora García Rivas, Alfredo de Ponticella, Marisa López Diz ou Miguel Monteavaro.