El Principáu renuncia qu’Asturies protagonice Lorient en 2011

Asturies nun va protagonizar el Festival Intercélticu de Lorient en 2011. Asina lo dictó la Conseyería de Cultura que por “dificultaes presupuestaries” arrenunció a que’l eventu cultural más importante de mundu celta tea dedicáu a Asturies.

350.00 euros yera lo que tenía qu’invertir la Conseyería de Cultura del Principáu pa qu’Asturies fuera la protagonista del Festival Intercélticu de Lorient en 2011, pero l’argumentación de la “dificultá presupuestaria” fai qu’Asturies nun vaya a destacar el prósimu añu penriba de los demás países participantes.

Esta negativa institucional fai que al pernomáu festival bretón nun-y quede otra que dedicar la edición de 2011 a la diáspora celta. D’otra miente, les autoridaes gubernamentales, que tamién punxeron la cita electoral autonómica de mayu como pilancu pal añu d’Asturies en Lorient, declararon que’l nuestru país va volver a participar nel eventu, pero cola representación ordinaria d’ ediciones postreres.

El responsable del Festival Intercéltico de Lorient, l’asturianu Lisardo Lombardía, llamentó en declaraciones la midía de la Conseyería de Cultura y resaltó’l so interés por que en 2013 puea ser, a la fin, l’añu d’Asturies en Lorient. Tamién señaló qu’en 2012 l’eventu va tar dedicáu a les provincias marítimes de Canadá.

26 años de presencia asturiana
Asturies participó per primer vez nesti certame intercélticu nel añu 1984, cola actuación del grupu folk Beleño. En 1986 algamó ser oficialmente la octava nación celta y, dende esa fecha, tolos años asitia la “Maison des Asturies” (la casa d’Asturies) na llocalidá bretona de Lorient. El Festival Intercélticu de Lorient ye’l eventu más importante del mundu celta, una amuesa d’ello ye que l’añu pasáu axuntó a más de 850.000 persones.