El Bloque lleva los Derechos Humanos a la Xunta Xeneral

El Bloque por Asturies, al traviés del so diputáu Roberto Colunga, presentó dos proposiciones non de llei pol respetu a los derechos humanos. Los presos mapuches en fuelga de fame y el pueblu pakistaní son los oxetivos d’esta proposición.

Roberto Colunga y Rafael Palacios, portavoz del BA, presentaron en rueda de prensa dos propuestes non de llei con carácter d’urxencia. Los nacionalistes quieren que la Xunta Xeneral amuese la so preocupación énte’l “peligru de muerte” que sufren decenes de presos políticos Mapuches y qu’encamiente al Gobiernu español a la cancelación de la Deuda Esterna de Pakistán, pola mor de les inundaciones d’agostu qu’afectaron a 21 millones de persones y causaron más de 2000 muertos.

“Estes proposiciones nos parecen fundamentales nesti momentu” señaló Rafa Palacios argumentando que “ye hora que la Xunta Xeneral se comprometa n’ámbitos fundamentales como la defensa de los derechos humanos y la solidaridá nestos momentos de crisis qu’afecten a munches partes del mundu”. El portavoz tamién contrapuso les proposiciones a los “discursos güecos” que se faen davezu nestos temes.

Nos documentos oficiales presentaos por Roberto Colunga a la Xunta Xeneral del Principáu d’Asturies, el Bloque por Asturies espón les sos reivindicaciones basaes nel cumplimientu de la llegalidá internacional, nel casu de la represión a la Nación Mapuche; y en retirar una Deuda Esterna que pesa sobre un Pakistán dañáu por desastres medioambiantales y que, según Palacios, namás que sirvió a “gobiernos corruptos” y nun se destinó “a l’atención del pueblu pakistaní”.