El cursín de bandurria asturiana amplíase al 2 d'ochobre

Pola mor del interés de la xente nel cursín de bandurria asturiana, ésti va celebrase tamién el 2 d’ochobre. D’esti mou, el músicu Daniel García de la Cuesta va introducir a esti instrumentu medieval los díes 25 de setiembre y 2 d’ochobre.

La bandurria asturiana ye un instrumentu tradicional que vien de la época medieval. Col enfotu d’espardir el so usu, el músicu Daniel García de la Cuesta, en collaboración col Muséu del Pueblu d’Asturies, organiza un cursín d’introducción a esti instrumentu.

“El cursín ta despelláu a tolos niveles y nun fai falta tener conocimientos previos”, señala de la Cuesta sobre’l cursu. Ésti va impartise de 10.30 a 14.00 y de 16.00 a 19.00 nes dependencies del Muséu del Pueblu d’Asturies. Nun entamu namás que diba ser el 25 de setiembre, pero, por mor del interés, amplíase tamién al 2 d’ochobre.

El preciu del cursu ye de diez euros y les persones que nun tengan instrumentu tienen que comunicalo nel intre d’apuntase, porque la organización pue apurri-yos ún.

Conciertu de bandurria
Como actividá complementaria va celebrase tamién un conciertu de bandurria asturiana. Enmarcao nel Ciclo Folk de Cámara Igor Medio, Daniel García de la Cuesta va actuar nel Muséu casa natal de Xovellanos el 24 de setiembre a les 19.30 hores.