Caxastur intégrase nel Sistema Institucional de Protección

Caxastur celebra esti 22 de setiembre l'Asamblea Xeneral Estraordinaria pa l'aprobación de la so integración nel Sistema Institucional de Protección (SIP), al par que Caxa Mediterráneu, Estremadura y Cantabria

Amás, esti martes conocíase que'l procesu de segregación de Caxa Castiella-La Mancha (CCM) en Bancu Liberta, propiedá de Caxastur, quedó completáu tres alzar a escritura público los alcuerdos pa la integración, según informó la entidá a la Comisión Nacional del Mercáu de Valores (CNMV).

La nueva entidá resultante va tener por denominación social Bancu de Castiella-La Mancha y la so see social va tar na localidá de Cuenca. D'esta manera, alzóse a públicu l'alcuerdu de segregación adoptáu pola Asamblea Xeneral de CCM el pasáu 30 de xunu, en virtú del cual queda segregáu'l so negociu bancariu a favor de Bancu Liberta, pente medies del trespasu en bloque y a títulu universal del conxuntu d'elementos patrimoniales principales y accesorios que componen el negociu bancariu.

Coles mesmes, elévase a escritura público la suscripción íntegra per parte de CCM de l'ampliación de capital social de Bancu Liberta de resultes del alcuerdu de segregación por un importe de 135,95 millones d'euros con una prima d'emisión total de 306,06 millones d'euros.

La integración tamién supon l'aportación y tresmisión a Bancu Liberta del conxuntu de los elementos patrimoniales que componíen el so negociu bancariu por un valor de 442,016 millones d'euros, axudicándose les nueves acciones creaes a la entidá propiedá de Cajastur.