Zapatero xustifica les espulsiones étniques ordenaes por Sarkozy

El presidente español, José Luis Rodríguez Zapatero, señaló que les espulsiones d'inmigrantes en situación irregular en Francia llevaes a cabu esti branu pol Gobiernu de Nicolas Sarkozy nun se realizaron pol so orixe étnicu.

Asina se pronunció Zapatero na entrevista concedida al 'Wall Street Journal' mientres la so visita a Estados Uníos. Según el presidente del Gobiernu, el mandatariu galu esplicó a los sos homólogos europeos nel conceyu de la UE de la selmana pasada "la so política de deportación qu'afecta a ciudadanos de Rumanía y Bulgaria".

"Algunos d'ellos yeren xitanos, otros nun lo yeren", señaló'l xefe del Executivu, sorrayando que "nun los deportaos pol so orixe étnicu".

Coles mesmes, consideró que "les midíes adoptáronse nel marcu del estáu de Derechu". "Los principios d'integración tienen que funcionar, pero tamién tien que respetase l'orde públicu nos campamentos nos suburbios que nun tienen condiciones sanitaries o de seguridá", puntualizó.

El xueves pasáu, Zapatero pidiere en Bruxeles a la Comisión Europea que nun prexulgue la política d'espulsiones de París antes d'examinar los argumentos ofrecíos por Sarkozy y censurara les declaraciones "absolutamente fuera de sitiu" de la vicepresidenta de la Comisión, Viviane Reding, a la qu'acusó d'atacar "tamién a España nel pasáu de forma poco afortunada".

Tropes n’Afganistán
Per otra parte, Zapatero dexó claro que les tropes españoles van siguir n'Afganistán hasta completar la so misión. "Yo siempre tuve contra la invasión d'Irak, pero siempre apoyé la intervención n'Afganistán", esplicó al rotativo económicu.

"Les tropes españoles van siguir n'Afganistán", sorrayó, como yá fuere la selmana pasada na so intervención nel Congresu de los Diputaos. "Hai que completar la misión de poner fin a la violencia y al terrorismu" nesti país, remachó.