La CSI entama a movilizase con vistes a la Fuelga Xeneral

Yá queda menos pa la Fuelga Xeneral del 29 setiembre y el sindicalismu de clase asturianu calienta motores. Uviéu, Avilés, Mieres y Xixón van vivir los prósimos díes diferentes movilizaciones convocaes pola Corriente Sindical d’Izquierda.

Les xornaes de movilización arranquen el miércoles 22 con una concentración n’Uviéu “contra la privatización” de Caxastur. La CSI opónse a la fusión de les caxes, argumentando que “forma parte d’un procesu de privatización que va traer consigo, al mediu plazu, la desapaición del modelu de caxes d’aforru” y convoca una concentración a les 17.30 nel Hotel Reconquista, coincidiendo cola Asamblea Xeneral de Caxastur.

D’otra miente el vienres 24 n’Avilés va haber una concentración a les 18.30 na Plaza’l Parche pola retirada de la Reforma Llaboral y del Proyectu de Reforma de les Pensiones. Mentantu que n’Uviéu, en collaboración cola CXT, va haber concentraciones a les 20.00 los díes 24, 25 y 26 pola realmisión de los despidíos na Pizzería La Competencia.

Manifestación alternativa pal 29-S
El día de la fuelga, va haber una concentración alternativa a los sindicatos mayoritarios en Mieres, mientres qu’en Xixón va salir a les 13 hores de la Plaza l’Humedal una manifestación convocada pola propia Corriente Sindical d’Izquierda. “Nun vamos participar con quienes consideramos cómplices d’esta realidá en nengún actu o convocatoria”, señala la CSI n’alusión a CC.OO y UXT.