2500 asturianos sacaron yá tarxeta colorada al maltratador

Cerca de 2.500 asturianos yá participaron na campaña de sensibilización contra la violencia de xéneru 'Saca tarxeta colorada al maltratador'. La iniciativa ta esti martes presente n'Uviéu, nun stand nel Paseu Los Álamos.

La directora del del Institutu Asturianu de la Muyer, María Campomanes va tar nel stand de la campaña y recordó qu’esta acción púnxose en marcha colos oxetivos d’esparder el nivel de rechazu ciudadanu énte'l maltratu, sensibilizar a la sociedá sobre la necesidá d'aisllar al maltratador y amosar tolerancia cero con toles formes y graos de la violencia contra les muyeres.

De la mesma, quier llanzar un mensaxe unánime de solidaridá y sofitu a les víctimes de la violencia de xéneru, convidándoles a que nun ruempan en solitariu col maltratu y lu faigan acompañaes de les alministraciones públiques y les organizaciones de muyeres espertes.

Cares populares asturianes
Siguiendo'l modelo estatal, l'elementu principal de la campaña son diez persones que destacaron na so trayectoria profesional y que tienen una estrecha vinculación con Asturies. Toos apurrieron la so imaxe, la so cara y la so voz de mou desinteresáu a esta iniciativa.

N’Asturies son los periodistes Juan Ramón Lucas y Ana García Siñeriz; los integrantes del grupu musical “El Sueño de Morfeo”, Raquel del Rosario, Juan Luis Suárez y David Feito; la montañera Rosa Fernández; la piragüista Jana Smidakova; los cantantes Cristina del Valle y Víctor Manuel; l'entrenador del Sporting, Manolo Preciado; y los futbolistes Santi Cazorla y David Villa.