Casquistes refuguen les crítiques internes a Álvarez-Cascos

El sector allegáu a Cascos consideró “graves” les manifestaciones feches esti llunes por fontes del PP d'Asturies contra l'ex ministru de Fomentu, Francisco Álvarez-Cascos, y dixeron qu'esperen que la dirección estatal del PP responda.

Partidarios de Cascos nel PP consultaos per Europa Press reaccionaron asina a les citaes manifestaciones de fontes del PP asturianu, que cargaron contra Cascos, refugaron cualquier pactu col ex ministru, calificáronlu de sesaxenariu y acusáronlu d'intentar frañir el PP.

Esi tipu de declaraciones, argumenten dende'l sector allegáu a Cascos, nun son aisllaes y “viénense repitiendo". Asina, dixeron que lo importante ye que los responsables d'eses acciones dean les oportunes esplicaciones. "Esto yá ta acuyá de les llendes del sentíu común, ye una falta de respetu contra'l PP y contra les persones", añeden.

Sicasí, les fontes defensores de Cascos consultaes nun quixeron afondar nes sos crítiques a les mentaes declaraciones, argumentando que “nun nos vamos a poner al so nivel".

Sía que non, partidarios del ex ministru reaccionaron primeramente calificando de "horror" o de "llocura" les manifestaciones contra Cascos, criticando amás que se realicen esi tipu d'ataques "dende l'anonimatu".


Candidatura na discrección
Tamién señalaron que fueron munchos los afiliaos y simpatizantes que llamaron a Xénova p'amosar el so malestar polo sucedío, daqué que, argumenten, ta "bien lloñe" de la conseña estatal del partíu sobre la posible candidatura de Cascos, que se basa na discreción, como aportunó esti llunes la secretaria xeneral del PP, María Dolores de Cospedal.