Manifestación de la CSI na Fuelga Xeneral

Manifestación convocada pola Corriente Sindical d'Izquierda (CSI).
 
Salida a les 13 hores de la Plaza l'Humedal de Xixón.
 
COMUNICÁU DE LA CSI ÉNTE LA MANIFESTACIÓN Y LA FUELGA XENERAL DE 29 SETIEMBRE

LA SITUACIÓN REAL: Asturies va camín de los 100.000 paraos y paraes, mientres que nel Estáu español averámonos a los 5 millones. Otros 5 millones de trabayadores nun lleguen al Salariu Mínimu Interprofesional (635 €). El 40 % de la mocedá ta desemplegao. Un millón y mediu de families tienen a tolos integrantes en paru (30.000 d’eses families son asturianes). Los sueldos nun algamen a la fin de mes, la probitú y la precariedá van xorreciendo y l’emprobecimientu’l conxuntu la población ye ca vegada más nidiu.
LA PATRONAL Y LA BANCA: pretenden siguir algamando los mesmos beneficios que nos bonos tiempos económicos a costa’l dineru público y del bolsu de los y les trabayadores. Quieren que trabayemos más y que cobremos menos, faciendo a los ricos más ricos y a los probes más probes.
EL GOBIERNU: verdaderu pelele de la patronal y la banca, impón una reforma llaboral qu’abarata y facilita’l despidu (d’esta miente torna los contratos fixos n’eventuales), conxela y disminúi los salarios, amenorga les pensiones o suprímeles, xube la edá xubilación a los 67 años, fai más precariu’l mercáu de trabayu y les condiciones llaborales, retaya les inversiones sociales y privatiza y deteriora la sanidá, la educación y los servicios públicos.
Pero, al empar, regala cientos de miles de millones d’euros a la banca y permite la continuidá d’una economía somorguiada (dineru prieto) que supón daveres una estafa a Facienda de más de 65.000 millones d’euros.
LOS SINDICATOS UXT Y CC OO: lo mesmó ún qu’otru son dinosaurios burocratizaos, con una casta dirixente cómpliz, bien de veces, del gobiernu y la patronal, financiaos y sosteníos polos estremaos gobiernos (incluyíos los autónomos y de conceyos), con un exércitu de lliberaos que, munches vegaes, busquen un abellugu pa safase del trabayu. Agora, el 29 de setiembre entamen una fuelga xeneral que, por primer vez na Hestoria, convócase con 3 meses d’antelación y con una reforma llaboral aprobada y que yá se ta aplicando de manera abondo xeneralizada. Nun podemos siguir enfotaos nestos sindicatos porque los sos dirixentes nin puen nin quieren defender los drechos de los y les trabayadores.
LA FUELGA DEL 29 DE SETIEMBRE: na CORRIENTE SINDICAL D’IZQUIERDA tamos por faer, non solo una fuelga, sinón toles fuelgues xenerales y sectoriales que faigan falta pa frenar la reforma llaboral y les midíes antisociales del gobiernu y la patronal, pero nun vamos participar con aquellos que consideramos cómplices d’esta realidá dura en nengún actu o convocatoria.
Poro, pidimos-yos a tolos y toles trabayadores que’l 29 de setiembre que vien nun vayan al trabayu y que participen na manifestación que la CSI va convocar el día 29 en Xixón a les 13:00 en La Plaza l’Humedal.