El Bloque critica al BNG y al PP por aliase p'atacar al carbón asturiano

El Bloque por Asturies criticó esti miércoles l'alianza del Bloque Nacionalista Galego y del Partíu Popular "en contra de los intereses del sector del carbón asturiano", por mor d’una proposición nel parlamentu de los nacionalistes gallegos.

L'agrupación considera que dicha actitú respuende a "una obsesión y a una cuestión de mala fe" p'atacar a Asturies y a un sector que, recuerden, ye "estratéxicu na economía asturiana".
  
Nuna nota prensa, argumenta que'l BNG presentó una proposición nel Parlamentu, na que "atacaba al carbón asturiano", cola escusa de que les primes van "contra los intereses de les térmiques gallegues qu'apostaron va años pol carbón polacu".
  
Per otra parte, llamenta'l "antiasturianismu" del PP "qu'equí diz una cosa y en Madrid vota la contraria y siempre contra los intereses d'Asturies". Nesti capítulu, recuerda qu'esti martes los 'populares' astuviéronse nel Congresu nuna votación que "yera clave pa los intereses de la economía", y la carta que l'europarlamentariu Alejo Vidal Quadras envió a la Comisión Europea, na que pidía "que nun s'aprobare'l decretu de prima al carbón asturianu".

“El Bloque por Asturies nun va consentir que les lluches partidistes y los intereses d'algún sector acaben con miles de puestos de trabayu y precarice tovía más les condiciones de vida de los asturianos", acabó la formación.

Nunca contra Galicia
D’otra manera, dende’l Bloque por Asturies añaden que “por coherencia” nunca tuvieron en contra de les ayudes a la economía gallega. “Nun fai falta más qu’alcordase del Prestige y l’ayuda de tolos sectores pa salvar a los pescadores gallegos del abandonu y la inutilidá de los políticos d’esa tierra igual en Galicia qu’en Madrid”, completen.