Nueva imaxen pa "Espaciu y Tiempu"

Una de les páxines divulgatives más completes sobre la llingua asturiana, "Espaciu y Tiempu de la llingua asturiana", estrena esta selmana una nueva imaxen meyorada y anovada.

Na páxina, que ta editada pola empresa Araz.net, vamos poder alcontrar diferentes conteníos venceyaos cola historia, el deprendizaxe o la lliteratura asturiana. Asina, na estaya "Deprende asturianu" afiértase un completu cursu d'asturianu con conteníos gramaticales que van dende l'alfabetu hasta l'usu del neutru materia. El temariu, que ta dividíu en dolce partes, apurre información gramatical y exercicios de repasu pa facer ensin movese del ordenador.
D'otra miente, y nel ámbitu meramente divulgativu, la estaya "La llingua asturiana" apurre bayura de datos relativos a la situación sociollingüística del asturianu, la llexislación, escolarización, y otros detalles d'interés p'asitiar la nuestra llingua nel contestu social qu'anguaño-y correspuende.
Pa finar, no tocante a la lliteratura de tipu oral y escritu, la páxina "Espaciu y Tiempu" cuenta asina mesmo con un "Archivu oral" que recueye la fala de persones de diferentes conceyos asturianos, demientres que'l "Proyectu Caveda y Nava" atropa bien de material lliterariu dixitalizáu.