Xuventú Asturianista valora la “I Xuntanza de Músicos Ástures”

Xuventú Asturianista vien de valor positivamente la “I Xuntanza de Músicos Ástures” que llevó’l fin de selmana a Ribeseya unos actos musicales alternativos. Los asturianistes sofitaron esta "respuesta a la voluntá antiasturiana del Gobiernu”.

“Ante la institucionalización del insultu y del despreciu escontra la cultura, la llingua y la música de la nuesa Patria qu'implicaba la programación gubernamental pal 8 de setiembre, yera necesaria una respuesta ciudadana”, señalen dende Xuventú Asturianista, que valoren que fuera la mocedá la que s’autoorganizara pa “desmarcase de la voluntá antiasturiana del Gobiernu d’Asturies”.

Nesi sen, les mocedaes del PAS espresaron el so deséu de qu’esta iniciativa se caltenga nos prósimos años “pola necesidá de continuidá na producción de música asturiana” y criticaron la política cultural del Gobiernu. “Una vegada más se volvió a poner de manifiestu la esencia colonialista del PSOE: la eliminación, desfiguración y marxinación de tolos elementos que constitúin la identidá nacional del pueblu asturianu”, denunciaron.

Procesu de rexeneración
Xuventú Asturianista tamién señaló la necesidá d’un “procesu de reconstrucción nacional col oxetivu final d'una Asturies asturiana, asturfalante y reunificada”, valorando l’autoorganización de la mocedá asturiana “como vía imprescindible pa la reconstrucción d'una autentica sociedá civil n’Asturies”.