EE.UU ye la principal fonte d'armes de los cárteles mexicanos

El diariu 'The Washington Post' denunció que la gran mayoría de les armes qu'utiliza'l crime organizáu en México vienen d'Estaos Uníos, a pesar del apoyu que la Casa Blanca facilitó al presidente Calderón pa combatir l'acción d'estos grupos.

"Los exércitos de narcotraficantes mexicanos tienen una fonte esterna d'armes y de financiación y pa la nuesa vergüenza, esa fonte ye Estados Uníos", dixo'l rotativu nun editorial tituláu 'El Tráficu d'armes en México' onde encamentó al presidente Barack Obama que torne la llucha contra'l tráficu d'armes nuna de les prioridaes de l'axenda de seguridá nacional.
   
Según un estudiu realizáu polos espertos Colby Goodman y Michel Marizco pal Centru Woodrow Wilson y la Universidá de San Diego, polo menos 62.800 de les 80.000 armes de fueu confiscaes  a les redes criminales mexicanes ente avientu del 2006 y febreru del 2010 veníen d'Estaos Uníos, lo que representa un tráficu illegal de 5.000 pieces añales.
   
"Sólo una tienda de Houston entregó 339 armes, ente pistoles y rifles, a los compradores de los cárteles en sólo 15 meses", recoyó'l diariu, al tiempu qu'aseguró qu'esta venta foi la responsable de la muerte de 18 persones nel país iberoamericanu, ente axentes de les fuerces de seguridá y civiles.
   
Nesti contestu, 'The Washingotn Post' consideró que l'esfuerzu realizáu pola alministración estaounidense pa combatir el crime entamáu en México, especialmente'l narcotráficu, nun ye bastante ante'l creciente fluxu d'intercambios illegales d'armes que s'executen al traviés de les 7.000 tiendes qu'existen na frontera común y que, na so mayoría, nun tienen la obligación de notificar les ventes individuales.
   
Asina, el rotativu calificó de "inaceptable" y "escandalosu" el fechu de qu'Estaos Uníos seya la principal fonte de venta d'armes a los criminales mexicanos, al tener en cuenta "la tensa llucha" na que s'alcuentra'l país "pa protexer el so Estáu de Derechu y la so democracia".

28.000 asesinatos en cuatro años
Dende que Calderón asumiere la presidencia de México nel 2006 rexistráronse más de 28.000 asesinatos, atribuyíos al crime organizáu que, nel últimu añu, protagonizó una escalada de violencia  por cuenta de la llucha ente bandes rivales del narcotráficu por controlar la ruta de la droga hacia Estaos Uníos.