El SNL de Mieres pieslla ente les crítiques de los trabayadores

Normalización Llingüística de Mieres vuelve a pesllar. Nun comunicáu, l’Asociación de Trabayadores de la Normalización Llingüística, critica a la Conseyería y reclama soluciones a la “inestabilidá llaboral” y a la “temporalidá” de dellos SNL.

Esperando la llegada de la financiación de 2011 que la Conseyería va dar, el Conceyu Mieres volvió a pesllar esti mes el Serviciu de Normalización. “Nun entendemos cómo unos Conceyos, contando cola mesma financiación, caltienen el SNL abiertu tol añu mientres que’l de Mieres sufre añu tres añu la desconsideración, dexadez y falta de compromisu”, denuncien dende l’ATNL.

“La Dirección Xeneral de Política Llingüística tien de garantizar que los SNL puedan desenvolver el so trabayu nunes condiciones estables y dignes” señala l’asociación de trabayadores, a la par que planten que “el métodu pol que se financien estos servicios ye claramente insuficiente y nengún añu garantizó la continuidá de tolos SNL”.

Según l’ATNL la responsabilidá ye más de la Conseyería que de los conceyos, sobre la que señalen que “ye la que financia’l SNL, tien una responsabilidá mayor, por ser l'organismu que xestiona esti dineru públicu y que tien el deber de controlar el so gastu y evitar la so malversión”.

Normalizar frenti a xestionar
L’Asociación de Trabayadores de la Normalización Llingüística, que nació pa “buscar soluciones a la inestabilidá llaboral y a la temporalidá de dellos SNL”, critica tamién que la Dirección Xeneral de Política Llingüistica nun dea soluciones al problema y “conceda subvenciones pa los SNL y nun garantice’l so funcionamientu y nin siquiera lleve un control de cuála ye la política lllingüística que se desenvuelve”.

“Pa nós la normalización ye’l mediu pel que consiguir un fin, la dignificación del idioma d’Asturies; pa la Dirección Xeneral de Política Llingüística paez ser que, en cambiu,  la normalización consiste en xestionar perres públiques ensin control nengún sobre la so inversión efectiva nesta mesma xera”, sentencien dende l’ATNL.