Felipe González plantea llegalizar les drogues nel mundu

L'ex presidente del Gobiernu Felipe González planteó que'l narcotráficu nun ye namás un problema de México, sinón que tien muncho que ver con Estados Uníos, y opinó que la solución podría ser una llegalización internacional de les drogues.

 
González, qu'asistió a la recepción entamada pol embaxador de México en Madrid, Jorge Zermeño, con motivu del 200 aniversariu de la independencia del so país, fizo especial insistencia en que la violencia que vive'l país azteca "nun ye un problema namás de México".

"México ta poniendo los muertos"  mientres que'l dineru que xenera'l narcotráficu, "los 350 o 360.000 millones de dólares tán na otra parte" de la frontera con Estados Uníos, señaló, sorrayando que "d'ehí vienen les armes". "Esi desequilibriu hai que cambialu", defendió en declaraciones a la prensa.

Coles mesmes, tres llamentar la visión simplista de la situación espresada pola secretaria d'Estáu norteamericana, Hillary Clinton, que comparó México cola Colombia d'hai dos décades, González calcó en que'l fenómenu de la criminalidá entamada ye internacional y ye "una de les amenaces a la seguridá más series que carez el mundu, nun sólo México".

L'ex presidente del Gobiernu consideró que podría ser "una opción" la celebración d'una conferencia internacional sobre esti asuntu, magar reconoció que ye "difícil que se vaya a producir".

Per otra parte, fizo una invitación pa "volver la vista atrás y pensar na criminalidá organizada n'Estaos Uníos, con miles de muertos, y que dependía de la illegalización del alcohol". Aquella violencia, recordó, "acabó, acabóse la prohibición y el negociu, colos impuestos que fuere, fízose llegal".

Alcuerdu internacional
Nesti sen, defendió como solución al problema la llegalización de les drogues, pese a que calcó en que "nengún país pue unillateralmente decidir eso sin un costu estraordinariamente grave pa los sos dirixentes".

Por ello, añadió, "tien que ser un acuerdu internacional, que se cumpla ente toos", dao que si fuere namás un país el que decidiere llevantar la prohibición habría "un crecimientu del consumu con un costu absolutamente inasumible pa los dirixentes políticos". "Creo qu'ési va ser l'únicu camín que tenemos realmente pa enfrentar" esti problema, añadió.