Bruxeles espedienta a Francia poles espulsiones de xitanos

La vicepresidenta de la Comisión Europea y responsable de Xusticia, Viviane Reding, anunció que nes próximes selmanes va expedientar a Francia por discriminación nes espulsiones de xitanos que vinieron realizando mientres esti branu.

"Toi convencida de que la Comisión nun va tener otra opción qu'entamar un procedimientu d'infracción contra Francia", afirmó Reding en rueda prensa. "La mio paciencia ta acabándose. Basta yá. Nengún Estáu miembru pue esperar un tratamientu especial cuando los valores fundamentales y les lleis europees tán en xuegu", resaltó.

L'espediente de Bruxeles contra Francia va basase en "l'aplicación discriminatoria de la directiva de llibre circulación de persones" y en "la falta de transposición de les garantíes procedimentales contemplaes na directiva de llibre circulación", esplicó la comisaria de Xusticia.

Reding esplicó que'l procedimientu d'infracción contra Francia va llanzase en dos selmanes y que va encamentar al presidente del Executivu comuñal, José Manuel Durao Barrosu, qu'aplique un procedimientu "aceleráu", dada la gravedá del casu.

"Ye importante que cambien non sólo les palabres sinón tamién el comportamientu de les autoridaes franceses", calcó. "Ye escandaloso qu'una parte del Gobiernu francés venga equí y diga algo y otra parte del Gobiernu faiga lo contrario en París", llamentó.

Recordó amás que la Comisión siguió mui de cerca los acontecimientos en Francia y díxose personalmente preocupada por una situación que da la sensación de qu'a la xente espúlsase d'un Estáu miembru de la UE namás por pertenecer a una minoría étnica. "Ye una situación que creo qu'Europa nun tien que volver ver tres la II Guerra Mundial", sorrayó.