Valledor cree qu’hai xente n’IX “a la espectativa” d’una fuerza asturianista

L'ex diputáu d’IX, Francisco Javier García Valledor, mostró'l so apoyu a la posible creación d'una fuerza política unitaria del asturianismu d'izquierda y considera que dientro d'IX hai "otra xente que ta a la espectativa" de qu'esta alternativa naza.

 Valledor respondió a les preguntes d'Europa Press dempués de participar na convocatoria de la Plataforma Unitaria pal 8 de Setiembre, convocada por organizaciones polítiques como Bloque por Asturies o Unidá Nacionalista Asturiana, amás d'otros colectivos y sindicatos. Ambes formaciones anunciaron al otru día la so intención d'empezar a dar pasos p'axuntar a tolos sectores del asturianismu d'izquierdes y l'ecoloxismu nuna candidatura unitaria pa les próximes elecciones autonómiques.

Preguntáu por si esti proyectu respondería a les sos espectatives, Valledor mostróse francu: "sí". "llevo muncho tiempu defendiendo una posición nesta llinia, y lo que llamento ye que la dirección d'Izquierda Xunida diere la espalda a un proyectu d'esti tipu, y que torne cada vez más nuna organización con poca o nenguna capacidá de ser esi elementu que pudiera axuntar y xenerar esa ilusión", criticó.

Señaló amás que "hai otra xente n'Izquierda Xunida, nesa llinia, que caltién una posición semeyante a la que yo puedo espresar, y que ta a la espectativa".

 Sobre la posibilidá de qu'él participare nuna candidatura d'esti tipu, l'ex parlamentariu evitó facer nenguna aclaración al respecto. "Lo importante nun ye'l pensar en persones que puean poner la cara a esa propuesta, sinón fundamentalmente algamar qu'esa propuesta seya una propuesta real y que se consolide". Con al respecto de la so situación personal actual, señaló tar "bien contentu" col so actual trabayu, profesor.

Valledor valoró'l 8 de Setiembre Unitariu, celebráu en Xixón el pasáu miércoles. "Yera una iniciativa necesaria, un primer pasu d'unidá, de convocatoria unitaria de superación de cuestiones que nun son fundamentales, y que tendría de conducir a poder construyir una fuerza político nel panorama asturianu".

Al so xuiciu "ye absolutamente necesario pa poder intentar recuperar la ilusión d'una parte bien importante de la xente que se siente d'izquierdes, asturianista, ecoloxista y republicana". "Agora", añadió, "hai que concretar un proyectu al que puean incorporase non yá fuerces polítiques, sinón sobremanera persones que tán a la espera de ver si realmente dase, si se concreta esa ilusión que pue xenerase".