Beatriz Quirós: “La educación nun ye nenguna prioridá pa esti gobiernu”

Beatriz Quirós (Llangréu, 1957) ye profesora de francés. Miembru del secretariáu del sindicatu d’enseñanza SUATEA y presidenta de la Xunta de Personal Docente, fala na entrevista de la crisis de la enseñanza n’Asturies.

 
Acaba d’entamar un nuevu cursu nel que sindicatos y profesionales denuncien una mala situación ¿Podría señalar algunos d’esos aspectos negativos d’esti cursu?
Lo primero qu’hai que dicir ye qu’esti cursu ta marcáu polos recortes. En materia salarial esti cursu tuvo un recorte adicional n’Asturies al marcáu pol gobiernu de Zapatero. Esto nun pasa n’otres comunidaes autónomes, namás qu’equí onde la situación económica sí ta pa despilfarros, pero non pa invertir n’educación. Equí la cabeza de turcu son los funcionarios y los docentes.

Amás de los recortes salariales tenemos recortes en materia d’emplegu y n’atención educativa. Esto ta empeorando les condiciones llaborales y l’atención educativa del alumnáu, nun cursu con un aumentu d’un 1’5% del alumnáu y un descensu de profesoráu. Tamién xuben abondo les medies xornaes, lo que quier dicir precarización y peores condiciones de vida por mor d’esto. Al empar xube’l paru y los docentes nes escueles y institutos tamos apretadísimos de trabayu, ensin personal qu’atienda a la diversidá, ensin desdobles, ensin llaboratorios, ensin programas educativos…

Con esta supresión de programas educativos, yá anunciada por Riopedre, vemos como desapaecen los horarios de biblioteca, suprímese’l programa lectivu d’horariu de tarde, desapaez l’apoyu a les nueves tecnoloxíes, quiten los comedores escolares. Tamién se reduz l’atención a la orientación educativa, necesaria pa munchos guah.es con problemes y munches families. Tamos viviendo una situación en qu’hai munches families en paru y con estes polítiques ta quitándose’l pan de la boca a les families más desfavorecides, en vez d’apoyales, que ye lo que tenía que facer la escuela.

Pesie a toes estes coses que denuncies, el nuevu Conseyeru d’Educación y Ciencia diz que’l cursu entama con normalidá...
El Conseyeru ta puestu ehí p’acabar esta llexislatura y nun quier oyir falar de problemes. Lo que ta claro ye que la educación nun ye nenguna prioridá pa esti gobiernu. El Conseyeru diz que sí, qu’agora tolos guah.es van tener un profesor, pero ye que yá pasó’l tiempu del mayestru ciruela que nun sabe lleer y pon escuela. Anguaño’l sistema educativu asturianu tien unes necesidaes y la sociedá demándales, porque la escuela pública ta ehí pa compensar les desigualdaes, non pa cubrir l’espediente, que ye lo que paez que ta faciendo agora’l Conseyeru.

Hai quexes en munchos institutos y escueles y yo nun se si ye qu’esti Conseyeru o nun sabe d’educación o ta ehí pa facer tragar la crisis y cumplir el llabor de tapafueos y que paeza que ta too bien. Pero la realidá negativa tamos viviéndola los centros educativos.

La Xunta de Personal Docente non Universitariu pidió va unes selmanes aconceyase urxentemente con él ¿Hubo rempuesta?
Nenguna. Nin la hubo nin la va haber. Se que tuvo reuniéndose colos directores, pero colos representantes sindicales nun se dignó nin a reunise, nin a llamanos, nin nada, pesie a les movilizaciones. Debe ser que tien poques coses que dicir.

Los recortes tán viviéndolos hasta los propios trabayadores de la Conseyería, onde cada vez hai menos personal y onde cada vez esa Conseyería ta más desprovista de fundamentos. Lo que quieren ye a ver si acaben con ella por agotamientu y que siga siendo la Conseyería d’Alministraciones Públiques la que corte’l bacaláu. Y esto tamién namás que pasa n’Asturies, el que seya la Conseyería d’Alministraciones Públiques la competente en materia de personal solo pasa equí. N’Asturies Riopedre yá consintió que se recortaren competencies a la Conseyería d’Educación y agora ta convirtiéndose nuna Conseyería col másimu gráu d’incompetencia.

Con toes estes coses que señalasti, dende SUATEA denunciáis que ta pasándose per un procesu de privatización de la enseñanza ¿Qué más pue añadir sobre esto?
Ye un procesu de desmantelamientu de la enseñanza pública, mientres que la privada ta frotándose les manes. Yá hai munchísimos servicios esternalizaos, como’l d’informática, o’l de comedor. Tamién tán gastándose millones y millones en usar servicios de Microsoft en cuenta d’usar software llibre… y nesti sen van munchos, munchos de los recursos que teníen que dir destinaes a otres coses.

Entós el procesu de privatización va per esi llau y pel del caltenimientu de los conciertos educativos. Nesta última etapa de Riopedre, los conciertos espardiéronse a niveles non obligatorios, como’l d’Educación Infantil. Esto evidentemente ta robando recursos a la escuela pública.

Tamién ye importante señalar que tán introduciéndose idegues privatizadores dientro de la xestión de lo público. Un exemplu ye un nuevu Plan d’Evaluación que quieren poner agora enriba la mesa, con rellaciones individuales ente’l patrón y cadún de los trabayadores. Esto son parámetros neolliberales que tienen muncho que ver cola Reforma Llaboral y demás midíes que se van implantar.

Yá que cites agora’l tema de la Reforma Llaboral, el 29 de setiembre ¿Qué hai? ¿Una Fuelga Xeneral o un llaváu de cara?
Bueno, los y les trabayadores lleven dende fai munchu tiempu desixendo que se convocare una fuelga xeneral. Polo tanto, ye verdá qu’hai una serie de sindicatos que tienen responsabilidaes colo que pasó, pero agora mesmu’l problema nun son los sindicatos. El problema ye’l Gobiernu del Estáu que ta cediendo a toles presiones de la Patronal y esta nun se vio tan contenta como agora, anque quieren más.

Dende’l puntu de vista de los trabayadores esta fuelga tien que ser un éxitu y nun tomar en cuenta otres coses, la historia nun se puede repetir y tenemos que dar un puxu enorme a la movilización y al debate nos centros de trabayu. Ye que muncha xente nun sabe lo que nos vien enriba, como que por exemplu agora nes alministraciones públiques la contratación pue ser al traviés d’ETT y que los recortes salariales que nos metieron a los funcionarios, van dir tamién pa tolos demás.

Tenemos que romper el mieu, porque tamos xugándonos la representación de la clase trabayadora. Los trabayadores nun nos podemos pelear y sí que ye verdá qu’hai sindicatos que tienen un doble llinguaxe difícil de caltener, que ye’l de dar la mano a quien te ta rompiendo la cabeza, pero ye un problema d’ellos. Agora nun se trata de llavar la cara a naide, sinón de lluchar polos derechos de tolos trabayadores, porque tamos toos metíos nesti barcu que va a pique. Y como la xente solo mire pal so ombligu, entós sí que va a pique de verdá.

En rellación a lo qu’acabes de señalar de mirar pal ombligu, usté que tien contactu cola mocedá ¿Cómo desplicaría la desmovilización d’esti sector? Ye ún de los más esplotaos…
Nós tamos viendo la introducción d’unos valores, tamién na escuela, que tán marcaos pola ideoloxía capitalista. Esa ideoloxía individualista de “yo miro pa min y los demás que se fadien” ye lo que se ta trasmitiendo a la xuventú dende piquiñinos. Polo tanto yo valoro muncho toles movilizaciones nes que ta xente mozo, que sí qu’hai, anque quiciabes tamos planteando unes movilizaciones que se queden caduques pa la cola xente mozo.

Pero sí que tamos nun momentu complicáu pa la mocedá, que ta avezada namás     qu’a contratos precarios o a trabayar ensin contratu. Los nuevos proletarios agora trabayen en grandes superficies y de repartidores con unes condiciones llaborales infames. Lo de les fábriques yá quedó atrás. Agora mesmu tamién ye mui importante l’atomización de la xente mozo dientro de la clase obrera y xuega un papel determinante na falta de contactu ente unos y otros. A too esto hai que suma-y el pan y circu, con toles idees d’ociu que se-y ofrecen a la mocedá. Pero bueno, yo pienso qu’esta crisis va tener algo positivu y ye que nun nos va quedar otru remediu que reaccionar.

Yá fixisti les critiques, agora falemos en positivo ¿Hacia qué modelu educativu tendríen que dir empobinaes les polítiques d’educación?
Lo primero a la defensa y potenciación de la escuela pública y non seguir perdiendo frente a la escuela privada, pagada tamién por nós. Y llueu favorecer una enseñanza de calter cooperativu, democrática y participativa, que forme ciudadanos críticos. Que se cree una ciudadanía activa, que domine les llingües de so, que seya conocedora d’esi mundu que queremos construir, que conoza saberes tradicionales y nuevos, pero al marxen d’esos saberes d’intereses axenos a la escuela. Entós pa too esto un sistema piramidal d’enseñanza nun val pa nada. Lo que pasa qu’agora como tamos nesa fase de resistencia de que nun mos quiten lo que tenemos, estes idees vense nun planu alloñáu.  

Pa finar yá, falemos un pocu de la llingua asturiana. El pasáu 8 setiembre sacastis un comunicáu pidiendo meyores pa esta materia na educación ¿Cómo ta anguaño l’asturianu na enseñanza?
Yo creo que ta estancao. Medra’l númberu de guah.es qu’estudien asturianu y nesi sen sería impensable un retrocesu, pero falten midíes. Un exemplu ye esto de que n’Asturies tea de moda’l bilingüísmu, pero ensin cuntar col asturianu. Hai que dar pasos palantre, pero tán torgaos por cuestiones alministratives, como la estupidez de non crear la especialidá de la llingua asturiana.

Anque col tema de la especialidá de la llingua asturiana agora tamos a tiempu, porque va haber un nuevu decretu d’especialidaes nel planu estatal y vamos pelear pa que se cree la especialidá d’asturianu, pa qu’esta materia tea al mesmu nivel que les demás. Esta cuestión va ser la primer cosa que-y vamos pedir al nuevu Conseyeru, pa empezar a furrular d’una forma normalizada. Claro, equí siempre entra la disculpa que siempre se nos da, que ye’l tema de la oficialidá, pero si hai voluntá política, anque falte oficialidá, se pue crear esa especialidá.

Ye que col tema del asturianu hai una doble situación. Per un llau ta la investigación n’asturianu, que ye una de les más vives, les propuestes pedagóxiques… y pel otru tenemos tola cadarma alministrativa que ye la que nos echa per tierra cualquier avance. Nós planteamos que s’entamen a dar materies usando l’asturianu como llingua vehicular, que nos dexen esperimentar n’algún centru y entamar per ehí, porque toos sabemos que falar dos llingües abre la puerta a falar la tercera y la cuarta mui bien. Pero bueno, col tema llingüísticu en xeneral hai una cerrazón y una ignorancia perespardida.