El Serviciu de Normalización Llingüística de Siero patrocina al Club Baloncestu Siero

Ta acabante de presentáse na Casa Conceyu de La Pola Siero una campaña del Serviciu de Normalización Llingüística promocionando la llingua asturiana nel deporte. Nesti casu la campaña consiste nel patrociniu de los equipos junior y senior del Club Baloncestu Siero dotándolos d’equipación de camiseta y pantalón pal xuegu, colos logotipos de la Conseyería de Cultura, del Conceyu Siero y del Serviciu de Normalización Llingüística, qu’estrena logotipu.
 
La entrega formal de les equipaciones féxola la conceyala d’educación, cultura y deportes, Mª Luz Quince Cifuentes, al presidente del club, José Rodríguez Valdés, y al direutor deportivu, Luis Canga; nel actu tamién taba presente’l responsable del SNL, Xosé Firmu García Cosío.

 Dientro de la mesma campaña editáronse tamién 2000 trípticos col oxetivu de fomentar esti deporte ente la población escolar y esparder y normalizar l’usu de la llingua asturiana nel ámbitu deportivu. Tienen forma de balón de baloncestu y incluyen unes nociones elementales, con un testín, un dibuxu esplicativu y el calandariu del equipu senior del Club Baloncestu Siero. El diseñu ye de Poli Mencía y el dibuxu de Sidoro Villa.
 
El presupuestu total de la campaña ye de 1500 €, toos ellos subvencionaos pola Conseyería de Cultura y Turismu. La intención del Conceyu Siero, manifestada pola conceyala, ye solicitar subvención a la Conseyería en siguientes convocatories pa poder llevar la iniciativa a otros deportes con presencia en Siero.
 
Hai que conseñar nel aspectu deportivu que l’equipu senior xugó’l sábadu nel polideportivu de La Pola Siero; la derrota énte’l Pumarín sitúalu na segunda posición de la primer categoría de la lliga autonómica de baloncestu. Los junior xugaron el domingu pela mañana. El club yá cumplió quince años y tien amás categoríes infantiles y escueles de baloncestu en La Pola, Llugones y urbanización La Fresneda.