El Congresu aprueba la Reforma Llaboral

|

El Plenu del Congresu de los Diputaos aprobó de forma definitiva la reforma llaboral n'aceptando 24 de les enmiendes incorporaes a la norma pol Senáu, una d'elles del BNG y el restu, toes del PSOE.

El PSOE se vio obligáu a xugar en cada votación colos apoyos de distintos grupos de la oposición pa sacar alantre les sos propuestes y eliminar aquélles que la Cámara Alta incorporó col so votu en contra, nun debate marcáu pola solombra de la güelga xeneral del próximu 29 de setiembre.

Anque l'alderique, que s'entamó col ministru de Trabayu, Celestino Corbacho, como únicu representante del Gobiernu, centrábase puramente nes enmiendes, tolos voceros aprovecharon pa espresar una posición global sobre la norma, qu'a nun siendo'l PSOE, foi unánime nel reproche al Gobiernu per parte de toles fuerces polítiques, y ente llamaos a la güelga per parte d'ERC, IU y ICV.

El ministru tomó la palabra pa valorar la manera na que se celebró la tramitación, "rematada cola rapidez deseada" pa eliminar "rocees" y sin "desvirtuar" los oxetivos esenciales del decretu llei nel que tien orixe, cola incorporación de más de 70 enmiendes pactaes colos grupos. "El tiempu diralo, pero probablemente la so vixencia va ser muncho más llarga de lo que munchos piensen", remarcó.

Corbacho destacó'l carácter "equilibráu" del testu y aseguró que la so aprobación coincide col entamu de la recuperación económica nun escenariu de "post crisis", respetando la realidá del modelu de relaciones llaborales n'España, sin poner en cuestión les instituciones básiques, como la causalidá de la contratación temporal y la tutela xudicial del despidu, respetando "íntegramente" los derechos de los trabayadores.

Supresión del puntu y coma
A lo último, la norma respeta'l testu pactáu por PSOE y PNV que concreta les causes económiques pal despidu oxetivu, de 20 díes d'indemnización, que va poder xustificase por "perdes actuales o previstes" o la "reducción persistente del nivel d'ingresos", suprimiendo un puntu y coma introducíu por CiU nel Senáu que, según el PSOE, "desvirtuaba" y "ampliaba" los supuestos.

Amás, xustifícase'l despidu por motivos d'absentismu llaboral, establecíos nuna llenda del 20% de les xornaes hábiles mientres dos meses siguíos, o'l 25% a lo llargo de cuatro meses discontinuos dientro d'un periodu d'un añu, siempre que la media de la plantiya nun supere'l 2,5%, dempués de que'l PSOE llograre eliminar una enmienda de la PNV que suprimía esti mínimu.

Nun s'endurez la conversión de temporales n'indefiníos
El PSOE tamién llogró eliminar otra de les enmiendes introducida pol PNV qu'obligaba a les empreses a facer fixos namás a aquéllos trabayadores qu'encadenaren contratos mientres trés años desempeñando'l mesmu puestu de trabayu y con idéntica actividá, mientres qu'agora namás tien que tar na mesma empresa mientres esi mesmu periodu.

Sicasí, sí aceptó la propuesta del BNG pa que la prestación por desempléu parcial se calcule por hores y non por díes, y que seya equivalente a la de la reducción de la xornada autorizada.

Los socialistes llograron que prosperaren les sos propuestes incorporaes nel Senáu, ente les que destaquen la reducción de 100 a 30 díes del periodu de 'gracia', del que disponen los paraos pa refugar cursos de formación sin penalizaciones, asina como cambios nel marcu de la entemediación llaboral de les empreses de trabayu temporal (ETT's) y les nueves axencies de colocación.

La izquierda llama a la güelga

El representante d'ERC, Joan Tardá, señaló que namás queda salir a la cai contra la reforma, anque esplicó que la so formación actúa de "manera responsable" votando col PSOE pa eliminar enmiendes que facilitaben el despidu por absentismu. "Pero que nun se engañen", alvirtió Tardá, que realizó un llamáu a la güelga dende la tribuna. "Los y les trabayadores nun merecemos esti comportamientu del Gobiernu", calcó.

El diputáu d'ICV, Joan Herrera, aseguró que'l Gobiernu trata de "arrequexar" a la izquierda social, minimizando la güelga xeneral del 29 de setiembre convocada contra una reforma "que nun val pa crear empléu", sinón pa "precarizar" los derechos llaborales, baxando xornales y "estendiendo'l despidu exprés". "Nunca como güei un Gobiernu merezse una güelga xeneral", remarcó.

La representante del BNG, Olaia Fernández Dávila, calificó de "vergoña" l'ausencia del Gobiernu nel debate y criticó una reforma llaboral que "va en contra de los derechos llaborales". La diputada de Coalición Canaria, Ana Oramas, remarcó que la reforma nun cuenta col "apoyu de los nacionalistes" porque nun presta a empresarios, sindicatos, nin a la mayoría del Parlamentu.

La diputada de Na Bai, Uxue Barkos, aseguró que'l testu final limítase "a definir l'abaratamientu" del despidu, que nun ye'l "revulsivu" que requier el mercáu pa "salir del túnel", mientres que per parte d'UPN, Carlos Salvador, llamentó que'l Gobiernu nun escuchare nenguna de les propuestes de la so formación.

El PP desea "suerte" a la reforma
El 'popular' José Ignacio Echániz aseguró que, pese a los "intrescendentes" cambios introducíos pol Senáu, el Gobiernu sigue "na más absoluta soledá" sin l'apoyu nin d'axentes sociales nin grupos políticos. "Ye la primer reforma llaboral de la hestoria qu'un Gobiernu impulsa en solitariu sin l'apoyu de naide", llamentó.

Al so xuiciu, la falta de reacción del Gobiernu contribuyó a "facer el paru crónicu" ante la negativa del Gobiernu a cambiar el 'status quo' del mercáu llaboral, dexando al llau la negociación col PP con un autismu voluntariu". "Pese a too, deseamos qu'acertaren y seyan a promover l'empléu como fizo'l PP", calcó.

El PSOE aplaude "por respetu" a los sindicatos
El socialista Jesús Membrado espresó dende la tribuna'l respetu de la so formación tanto a les crítiques de los sindicatos como a la movilización --lo cual provocó los aplausos de la bancada del PSOE-- y calificó de "coherente" programáticu'l refugu de les minoríes d'izquierda, pese a qu'atacó al PP que, al so xuiciu "nun aportó" nada, nun siendo'l votu negativu "sin dar la cara" y con "mensaxes apocalípticos".

El diputáu de CiU Carles Campuzano señaló que les últimes cifres de paru confirmen que "les inxusticies" del mercáu llaboral español "nun se tán corrixendo" cola reforma. Coles mesmes, llamentó que "la penalización" de la contratación llaboral nun va na bona dirección, porque va fomentar el despidu. "Asumimos les nueses responsabilidaes, pero nun ye la reforma de CiU", remarcó.

El diputáu de la PNV, Emilio Olabarria, señaló que la reforma ye "fallida" y nun afloren "debidamente los problemes" en materia d'encadenamientu de contratu temporal y una presencia "sobredimensionada y escomanada" de los sindicatos nes empreses más pequeñes, ente munches otres cuestiones. Son munchos los fracasos, aseguró Olabarria, pese a que celebró que'l Parlamentarismu permitiere resolver "los esgarros" que contenía'l testu orixinal.

 

Contador Estadistiques