El Pricipáu prevé que la tasa de paru n'Asturies aumente nos próximos meses hasta algamar la media estatal

El director xeneral de Promoción d'Emplegu del Principáu, José Luis Álvarez Alonso, estima que la tasa de paru n'Asturies, nesti momentu asitiada nel 9,95%, va algamar nos próximos meses a la media nacional, que ye d'un 13,91%. Según les sos previsiones, la comunidá autónoma va entamar sufrir agora l'aumentu del desemplegu qu'enantes sufrieron les zones del sur y el llevante español.
 
Fueron les conclusiones que presentó a los medios de comunicación en rueda prensa, tres publicase los datos de la encuesta de población activa referente al pasáu añu 2008. Na mesma, s'espeya un incrementu del paru del 26,42%, sobre'l 2007, y con 10.200 desemplegaos más.
 
Entrugáu polos periodistes sobre esta tendencia, Álvarez esplicó que la "llinia xeneral ye que les rexones del norte vavan averándose progresivamente a les medies nacionales". "Previsblemente, nos próximos meses va haber un incrementu de paru superior nel norte que nel llevante y nel sur, pola estructura económica y la so afeición pola crisis", matizó. Dende'l so puntu de vista, "lo que pasó enantes nel restu d'España, sobre too nel sur y llevante, mos ta llegando agora".
 
El director d'Emplegu alcuentra la esplicación a la situación en que la "primer parte del deterioru del emplegu se produxo nel sector de la construcción, principalmente na construcción de segunda residencia, que tenía mayor pesu na zona del llevante y el Sur". "En cambiu", añadió, "tenía menos incidencia nel norte d'España". "Cuando s'amortiza esta situación, les rexones del norte tienen la consecuencia de la baxada d'actividá de la construcción lligada a la falta de financiación y el descensu del consumu", matizó.
 
Álvarez nun s'atrevió a realizar una previsión sobre la posible salida de la crisis, pero recordó que la tendencia ye al "allargamientu y afondamientu nel 2009, con prollongación demientres el 2010, pero nun se pue predicir bien porque les variables que mos afeuten son importante y globales".