¿Qué futuru espéranos a los mozos asturianos?

Anguaño, l'Estáu Español atópase somorguiáu nuna coxuntura económica que ta faciendo que les tases de paru aumenten. Los asturianos vivimos nuna comunidá que lleva en crisis munchos años, anque siempres que la situación económica yera bona, equí en Asturies les tases de desempléu siguíen siendo peraltes (ente les mayores de les comunidaes autónomes). Cuando n'España había bonanza económica, en Asturies los mozos asturianos teníen qu'emigrar por falta d'empléu, abandonando la so tierra y les sos families pa buscase la vida n'otros sitios; sicasí'l Presidente del Gobiernu Asturianu miraba pa otru llau diciendo que eso yera “una lleenda urbana”.

Personalmente esmuelme enforma'l futuru que nos espera a los mozos asturianos, cuando acabamos la nuesa preparación. El futuru de los mozos asturianos nun puede basase en trabayar nuna hamburguesería o partiendo pizzes nuna moto o en decidir dinos a Madrid a buscar empléu.

Una comunidá na cual hai menos empreses que creen empleos, falta de negocios entamadores, falta d'iniciativa ya inversión que ye lo que nos lleven vendiendo los gobernantes políticos. El futuru que se nos presenta ye bien negru, una comunidá que cunta con un texíu industrial probe, col constante zarru d'empreses y aumentu del paru, un gobiernu impotente, que se calla cuando nos retayen dineru en tou y nun diz nada por non perxudicar al so propiu partíu.

Esta nun ye una cuestión que digamos que pueda solucionase d'un día pa otru, ye una cuestión qu'amás tenemos que solucionar los asturianos, pero ye ciertu que lo primero que tenemos que faer ye ser conscientes de que la política asturiana precisa un cambéu, un xiru d'aldu onde los partíos que tienes a Asturies como prioridá, como exa de la so política tean representaos na Xunta. Esi ye una pilastra de mano a construyir una Asturies moderna, una sociedá que tea nuna mira de crecedera y progresu nesti sieglu XXI,una comunidá próspera, con futuru, una Asturies arguyosa de sigo mesma, que tea presente nel mundu.

Eso ta na mano de toos y nunos meses ye lo que debemos de demostrar que somos capaces de trabayar y lluchar por esta Asturies que se nos funde, qu'apreciamos la tierra onde vivimos y ser conscientes de los que xugamos.

Feliz Día d’Asturies a toos y toes.

Xuan Pandiella Sánchez

Voceru de Xuventú Asturianista.