El presidente de la Eurocámara refuga l'usu de les llingües rexonales nos plenos del parlamentu de Bruseles

El presidente de la Eurocámara en Bruseles, Hans-Gert Pöttering, refugó ayeri l'usu de les llingües rexonales nel Parlamentu de Bruseles, motivu pol que lu criticó güei l'eurodiputáu d'ICV, Raül Romeva, que consideró les sos afirmaciones "llamentables".
 
Pottering, en declaraciones a los medios, señaló que s'algamó un "compromisu xustu" nesti tema, y que si s'almitiere l'usu nos plenos de "toles llingües rexonales, por mui importantes que seyan, el sistema nun diba poder funcionar".
 
Romeva, pela so parte, pidió "un apoyu decidíu, claro y firme" del Gobiernu español nesta cuestión. "Hai munchu tiempu que munchos diputaos reclamamos un derechu fundamental y llexístimu como ye l'usu de la nuesa llingua nel Parlamentu Européu, pero topamos continuamente con dellos frentes opositores", indicó Romeva, qu'esplicó que yá-y lo espunxo a Pöttering en repetíes ocasiones.
 
Calcó en que-y esplicaron que'l catalán ye una llingua normalizada en munchos ámbitos institucionales, que la falen millones de persones y que "nun se pue llendar l'usu d'una llingua nuna institución como'l Parlaamentu européu, a les llingües que tienen ámbitu estatal".
 
Almitió les llendes que tien pa defender esta cuestión, al destacar que dende Europa-yos retruquen que piden dalgo que nun se fai nel Congresu de los Diputaos. Poro, encamentó a la cámara española a reivindicar esta cuestión. "Na midida en qu'esto lo tengamos iguao, va ser más fácil poder aplicalo tamién nel Parlamentu Européu", aseguró.