Colunga llanza nel Parllamentu un discursu críticu y d’esperanza

El diputáu del BA y portavoz del Grupu Parllamentariu Mestu, Roberto Colunga, criticó nel Plenu de la Xunta Xeneral del Día d’Asturies la situación del país, les polítiques del Gobiernu y llamó a la “suma de voluntaes pa construyir otra Asturies”.

“Esti plenu ye una oportunidá pa facer una reflexón de la situación política y social del nuestru país”, entamó la intervención de Colunga, que criticó que pa les demás fuerces namás que significa “un actu protocolariu que, cola disculpa de la fiesta que llamen Día de Asturias, abre’l nuevu cursu políticu”.

La intervención del diputáu del Bloque por Asturies tuvo cargada de crítiques pa col actual Gobiernu: “Más de la metá de los ciudadanos y ciudadanes d’Asturies, piensen que’l Gobiernu del Principado nun tien capacidá pa defender los intereses d’Asturies”, denunció. Pero tamién fueron abondes les palabres en positivu, como’l so enfotu en “la esperanza d´un futuru meyor y la fuerza de la unidá pa facelo rialidá”.

Contra’l “provincianismu” d’esti 8-S
En rellación a los actos programaos pol Gobiernu del Principáu pal 8 setiembre, la rempuesta foi contundente. Colunga los calificó de “despreciu polo propio” y de demostración del “provincianismu más penosu”, al empar que criticó que pal Gobiernu la nuestra llingua y cultura “nun tienen calidá pa representanos como pueblu”.

Como contraposición a la postura oficial, el diputáu del Bloque faló de “construyir una Asturies plural, moderna y abierta. Na que’l patrimoniu, llingua y cultura tengan el papel qu'agora se-yos niega”. La reclamación de la “irrenunciable” oficialidá y de la defensa de la identidá propia tuvieron presentes na intervención.

Crítiques al modelu económicu
“Desarrollismu ensin desarrollu real”, con esi exemplu Colunga definió la política económica asturiana. Denunció problemes medioambientales que surden por “facer negociu y enriquecer multinacionales” con “incineradores, llínies d’alta tensión, muselones, regasificadores”. D’ello criticó el “coste social y económicu inxustificable”.

Nun faltó la crítica a los recortes y la Llei d’axuste, causa cimera de que’l Bloque por Asturies abandonara’l Gobiernu asturianu. Acusó a los recortes “neolliberales” aplicaos por Madrid y ampliaes pol gobiernu asturianu de torgar “un futuru dignu pa la xente d’Asturies”. Sobre la citada llei señaló que ye “el primer pasu p’acabar cola sanidá y la educación públiques, coles polítiques sociales y colo poco que nos queda del supuestu estáu del bienestar”.

Nesti sen, afondó na necesidá de que’l Gobiernu del Principáu defienda los derechos d’Asturies en Madrid y de una rempuesta “contundente” a les múltiples “agresiones” y problemes que Colunga señaló.

Llamada al cambiu
“El futuru d’Asturies pasa porque’l nuestru pueblu recupere la so capacidá de decisión sobre’l so futuru”, afirmó Colunga nun final optimista de la so intervención. “Fai falta un cambiu y nun pue haber espaciu pal pesimismu”, insistió, a la par que señaló l’alternativa: “poner en marcha polítiques al serviciu de la mayoría col oxetivu d’algamar una sociedá basada na xusticia social, la rexeneración política y la firme defensa del mediu ambiente”.

“Demos una rempuesta democrática que contraponga al silenciu y la resignación del réximen”, sentenció el diputáu del Bloque por Asturies nesta intervención na que sorrayó qu’esti 8 de setiembre tenía que ser de “movilización y llucha”.