El Garrapiellu y la Fundación J.M Zapico convoquen concursos

La Tertulia Cultural El Garrapiellu y la Fundación Juan Muñiz Zapico tán acabantes de convocar concursos lliterarios respectivamente. Mentantu los primeros lo faen de rellatos curtios n’asturianu, el segundu ye de microrellatos mineros. 

La Tertulia Cultural El Garrapiellu vien de convocar la XIX edición de los Premios de Cuentos Curtios el Garrapiellu. Con plazu d’entrega hasta’l 12 d’ochobre, nesti concursu pue participar toa persona mayor de 16 años. El cuentu tien que tar escritu en llingua asturiana, acordies cola normativa de l’ALLA, y con temática llibre.

Per otru llau, la Fundación Juan Muñiz Zapico abre’l plazu pa presentase a un concursu de microrellatos con temática minera. La llingua vehicular de les obres pue ser asturianu o castellanu y el llargor de la creación lliteraria nun pue pasar de les 40 llínies. El plazu d’entrega va zarrase’l 21 d’ochobre.