Abbas pide qu’Israel ceda n’asuntos claves pa Palestina

El presidente de l'Autoridá Palestina, Mahmud Abbas, aseguró esti llunes que "facía les maletes" y abandonaría les conversaciones directes con Israel si'l Gobiernu hebréu nun vence n'algunos de los asuntos clave pa los palestinos.

Abbas, que s'alcuentra de viaxe oficial pel norte d'África, aseguró tamién que cortaría’ retomáu diálogu si Israel vuelve a entamar la construcción nos asentamientos asitiaos en Cixordania y sobre los que pesa una moratoria vixente hasta'l próximu 26 de setiembre. Sicasí, negó que vaya a debatir la denominación d'Israel como Estáu xudíu porque "pue llamase como quiera", según declaraciones realizaes a dellos medios de comunicación árabes.

“Pa empezar" estes nueves conversaciones, entamaes la selmana pasada en Washington al paragües d'Estaos Uníos, Abbas señala "fronteres y seguridá" como temes a tratar. La próxima selmana, Abbas y el primer ministru israelín, Benjamin Netanyahu, van reunise n'Exiptu pa retomar el diálogu, en presencia de la secretaria d'Estáu norteamericana, Hillary Clinton.

Importancia de les llendes
La cuestión de les fronteres d'un hipotéticu estáu palestín ye importante porque, según Abbas, un acuerdu nesti sen significa que se llograría "una solución pa Xerusalén, l'agua y los asentamientos". En cualquier casu, el dirixente palestín avanzó que la firma d'un tratáu de paz va significar el refugu de "cualquier presencia israelina, seya civil o militar, nos territorios palestinos", según declaraciones recoyíes pol diariu 'Haaretz'.